ភ្នំពេញ៖ ការវិនិយោគលើការបង្កើតឧទ្យានឧស្សាហកម្មបៃតង នឹងមានការវិនិយោគពីចក្រភពអង់គ្លេសបន្ថែមទៀត ដែលកន្លងមកឧស្សាហកម្មបៃតងនេះ មានការវិនិយោគពីកូរ៉េ និងជប៉ុន តែប៉ុណ្ណោះ។ នេះជាការលើកឡើងរបស់សម្ដេចតេជោ ហ៊ុន សែន ប្រធានព្រឹទ្ធសភា នាថ្ងៃទី៣០ ខែឧសភា ឆ្នាំ២០២៤។

ក្នុងជំនួបជាមួយសម្ដេចតេជោ ហ៊ុន សែន ឯកឧត្តម ដូមីនីក វីលៀមស៍ ឯកអគ្គរាជទូតអង់គ្លេស បានលើកឡើងថា ខ្ញុំពិតជារីករាយដែលចក្រភពអង់គ្លេស បានចុះហត្ថលេខាជាមួយក្រសួងសេដ្ឋកិច្ចនិងហិរញ្ញវត្ថុ លើការរៀបចំអភិវឌ្ឍន៍គម្រោងហេដ្ឋារចនាសម្ព័ន្ធបៃតងថាមពលកកើតឡើងវិញ និងកិច្ចសហប្រតិបត្តិការនៅក្នុងវិស័យការពារជាតិ។ ពិសេស ការកើនឡើងនៃទំហំពាណិជ្ជកម្មរវាងប្រទេសទាំងពីរជាបន្តបន្ទាប់ និងមានការបង្កើតវេទិកាវិនិយោគ ដើម្បីទាក់ទាញការវិនិយោគពីអង់គ្លេសមកកម្ពុជា។

ក្នុងជំនួបដដែល សម្ដេចតេជោ ហ៊ុន សែន បានមានប្រសាសន៍ថា ទោះបីអង់គ្លេសចាកចេញពីសហគមន៍អឺរ៉ុបក៏ដោយ ក៏វេទិកាវិនិយោគកម្ពុជា-អង់គ្លេស និងគោលនយោបាយរបស់អង់គ្លេសចំពោះកម្ពុជា គឺមិនមានការប្រែប្រួលនោះទេ។ សម្ដេចតេជោប្រធានព្រឹទ្ធសភា បានលើកទឹកចិត្តឱ្យឯកអគ្គរាជទូតអង់គ្លេស បន្តធ្វើការជាមួយរាជរដ្ឋាភិបាលថ្មី លើវិស័យពាណិជ្ជកម្ម និងការវិនិយោគ ដើម្បីចូលរួមជំរុញទំហំពាណិជ្ជកម្មរវាងភាគីទាំងពីរឱ្យមានការកើនឡើងបន្ថែមទៀត៕