ភ្នំពេញ៖ កម្មវិធីចែករំលែកទីតាំងផ្ទាល់ខ្លួន (Real-Time Location) ដែលមានមុខងារតាមដានទីតាំងណាត់ជួប ឬសុវត្ថិភាពសមាជិកគ្រួសារ មិត្តភក្តិ កំពុងមានប្រជាប្រិយភាពក្នុងចំណោមអ្នកប្រើប្រាស់បណ្តាញសង្គមជាពិសេសស្រទាប់យុវវ័យ។ កម្មវិធីនេះ បានផ្តល់ភាពងាយស្រួលក្នុងការតាមដានទីតាំង ប៉ុន្តែការប្រើប្រាស់ដោយខ្វះការប្រុងប្រយ័ត្នអាចនាំមកនូវហានិភ័យធ្ងន់ធ្ងរមួយចំនួនដូចជា៖

ទី១. ហានិភ័យបាត់បង់ឯកជនភាព ការបើក Real-time location អាចឱ្យអ្នកដទៃ ដឹងគ្រប់សកម្មភាពរបស់អ្នកថាអ្នកនៅទីកន្លែងណា និងធ្វើដំណើរទៅទីណា ប្រសិនបើព័ត៌មាននេះ ធ្លាក់ទៅក្នុងដៃជនខិលខូច ពួកគេអាចប្រើប្រាស់វាដើម្បីតាមដានប្រព្រឹត្តអំពើទុច្ចរិតលើអ្នក។ ទី២. ហានិភ័យចោរកម្ម មានន័យថា ការបង្ហាញទីតាំងអ្នកកំពុងនៅឆ្ងាយពីផ្ទះ អាចក្លាយជាឱកាស សម្រាប់ជនខិលខូចគាស់ផ្ទះ លួចយកនូវសម្ភារមានតម្លៃ និងទី៣. ហានិភ័យលេចធ្លាយទិន្នន័យ កម្មវិធីមួយចំនួនអាចប្រមូលទិន្នន័យរបស់អ្នក​តាមរយៈ​ការបញ្ចូល​អត្តសញ្ញាណ​ដូចជា​ ឈ្មោះ​អាសយដ្ឋាន​ លេខទូរស័ព្ទ​ដៃជាដេីម​ ដើម្បីយកលក់បន្ត ឬអាចរងការវាយប្រហារពី Hacker ដែលធ្វើឱ្យព័ត៌មានសម្ងាត់របស់អ្នកត្រូវបានលាតត្រដាង។

ដើម្បីកាត់បន្ថយហានិភ័យខាងលើ ក្រុមការងារបច្ចេកទេសនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានណែនាំដល់អ្នកប្រើប្រាស់ដាច់ខាតកុំចែករំលែកទីតាំងតាម​រយៈ ​QR Code ឬ ID គណនីរបស់ខ្លួនទៅកាន់ជនមិនស្គាល់ ឬលើបណ្តាញសង្គម ដោយគប្បីប្រើប្រាស់តែជាមួយក្រុមគ្រួសារ និងមិត្តភក្តិជិតស្និទ្ធ៕