ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លើកទឹកចិត្តឱ្យក្រុមអ្នកផលិតមាតិកាទេសចរណ៍ (Influencers) បន្តពង្រឹងគុណភាពមាតិកា ភាពច្នៃប្រឌិត និងការសហការជាមួយស្ថាប័នពាក់ព័ន្ធ ដើម្បីរួមចំណែកជំរុញការអភិវឌ្ឍវិស័យទេសចរណ៍កម្ពុជា ឱ្យមានការរីកចម្រើនបន្ថែម។

ក្នុងឱកាស ឯកឧត្តមរដ្ឋមន្ត្រីទេសចរណ៍ សំណេះសំណាល និងវាយតម្លៃខ្ពស់ចំពោះការខិតខំប្រឹងប្រែង និងការចូលរួមយ៉ាងសកម្មរបស់ក្រុម Influencers ដែលបានប្រើប្រាស់វេទិកាបណ្តាញសង្គម និងមាតិកាឌីជីថល ដើម្បីបង្ហាញអំពីសក្ដានុពលទេសចរណ៍ វប្បធម៌ ប្រវត្តិសាស្ត្រ និងអរិយធម៌ដ៏សម្បូរបែបរបស់កម្ពុជា ដល់សាធារណជនជាតិ និងអន្តរជាតិ ឯកឧត្តម ក៏បានចែកបណ្ណសរសើរ ជូនដល់ក្រុមអ្នកផលិតមាតិកាទេសចរណ៍ (Influencers) ទាំងជាតិ និងអន្តរជាតិ ផងដែរ៕