ភ្នំពេញ៖ ក្រុមហ៊ុន Wanli Tire ដែលជាក្រុមហ៊ុនផលិតសំបកកង់រថយន្តដែលមានគុណភាព ស្តង់ដាកម្រិតពិភពលោក សម្រេចចិត្តជ្រើសរើសខេត្តស្វាយរៀង សម្រាប់ការបណ្តាក់ទុនវិនិយោគលើការផលិតសំបកកង់រថយន្ត សម្រាប់ធ្វើការនាំចេញទៅ កាន់ទីផ្សារពិភពលោក។

ពិធីសម្ពោធដាក់ឱ្យដំណើការជាផ្លូវការចង្វាក់ផលិតកម្ម ផលិតសំបកកង់រថយន្តរបស់រោងចក្រ Wanli Tire Co., Ltd លោក សរ សុដានី អភិបាលរងខេត្តស្វាយរៀង លើកឡើងថា វត្តមានរោងចក្រផលិតសំបកកង់រថយន្ត Wanli Tire ដែលបានសម្ពោធដាក់ឱ្យដំណើការជាផ្លូវ ការចង្វាក់ផលិតកម្មនាថ្ងៃនេះ គឺជាសក្ខីភាពសរបញ្ជាក់ឱ្យឃើញពីមនុញ្ញផល ដែលកើតចេញពីចំណងកិច្ចសហប្រតិបត្តិការដ៏រឹងមាំ រវាងកម្ពុជា-ចិន។ លោកភិបាលរងបន្តថា ខេត្តស្វាយជាខេត្តមួយដែលទទួលបានផលវិជ្ជមានច្រើនពីបណ្តាដៃគូវិនិយោគនានា ដែលបានមកបណ្តាក់ទុនវិនិយោគក្នុងខេត្ត ពិសេសគឺមកពីប្រទេសចិន។

លោក សរ សុដានី សង្ឃឹមថា នឹងមានការលក់ចែកចាយនៅក្នុងស្រុកផងដែរ ដើម្បីឱ្យពលរដ្ឋកម្ពុជា បានស្គាល់និងបានប្រើប្រាស់សំបកកង់រថយន្តដែលមានគុណភាព ស្តង់ដាកម្រិតពិភពលោក Wanli Tire នេះ។ លោកអភិបាលរងបន្ថែមទៀតថា ការលេចឡើងជារូបរាងនូវរោងចក្រ Wanli Tire ពេលនេះគឺពុំមែនជាការចៃដន្យនោះទេ ប៉ុន្តែជាការកើតឡើងដោយឆ្លងកាត់នូវការសិក្សា ស្វែងយល់យ៉ាងស៊ីជម្រៅ ច្បាស់លាស់របស់ក្រុមហ៊ុន ក៏ដូចជាការបង្ហាញឱ្យឃើញយ៉ាងជាក់ច្បាស់អំពីការផ្តល់សេចក្តីទុកចិត្ត របស់វិស័យឯកជនមកលើសក្តានុពលដែលមាននៅក្នុងមូលដ្ឋានខេត្តស្វាយរៀង៕