ភ្នំពេញ៖ ចិន គឺជាប្រទេសឈរលើលេខរៀងទី១ ដែលជាដៃគូពាណិជ្ជកម្មដ៌សំខាន់របស់កម្ពុជា ក្នុងឆ្នាំ២០២៥ ដោយមានទំហំពាណិជ្ជកម្មចំនួន ១៩,៧៣ ពាន់លានដុល្លារ។ តាមរបាយការណ៍របស់ក្រសួងពាណិជ្ជកម្ម ឆ្នាំ២០២៥ នេះ កម្ពុជា សម្រេចបានការនាំទំនិញចូលបាន ៣៣,៩៦ពាន់លានដុល្លារ ដែលមានការកើនឡើងចំនួន១៨% បើធៀបតាមរយៈពេលដូចគ្នាក្នុងឆ្នាំ ២០២៤​ និងការនាំទំនិញចេញសម្រេចបានទំហំ ៣១,២៨ពាន់លានដុល្លារ កើនឡើងបាន ១៧%។

ចំពោះ ដៃគូពាណិជ្ជកម្មសំខាន់សម្រាប់កម្ពុជាបន្ទាប់ពីចិន គឺប្រទេសក្នុុងតំបន់អាស៊ាន កម្ពុជាសម្រេចបានទំហំពាណិជ្ជកម្ម ១៦,៣៧ពាន់លានដុល្លារ, សហរដ្ឋអាម៉េរិក មានទំហំ ១៣,១៥ពាន់លានដុល្លារ, សហភាពអឺរ៉ុប សម្រេចបាន ៥,៨៧ពាន់លានដុល្លារ, ជប៉ុន សម្រេចបាន ២,៥៣ពាន់លានដុល្លារ, កាណាដា មានចំនួន ១,៣៣ពាន់លានដុល្លារ និងមានប្រទេសផ្សេងៗទៀត។

ចំណែក ទំនិញ ដែលកម្ពុជាបាននាំចេញ​ទៅកាន់ទីផ្សារអន្តរជាតិ មានដូចជា៖ សម្លៀកបំពាក់, ស្បែកជើង, សម្ភារធ្វើដំណើរ និងកាបូប, អង្ករ, សំបកកង់រថយន្ត, គ្រាប់ស្វាយចន្ទី, គ្រៀងអេឡិចត្រូនិក និងភាគបំណែក, ដំឡូងមី, កង់, ខ្សែភ្លើង និងបង្គុំខ្សែភ្លើង៕