ភ្នំពេញ៖ ក្នុងឆ្នាំ២០២៥ កម្ពុជាទទួលបានការចុះបញ្ជីគម្រោងវិនិយោគសរុបចំនួន ៦៣០ ក្នុងទំហំទុនវិនិយោគសរុបប្រមាណ ១០ប៊ីលានដុល្លារអាម៉េរិក និងអាចបង្កើតការងារបានប្រមាណ ៤៣៨ពាន់កន្លែង។ បើធៀបនឹងរយៈពេលដូចគ្នាក្នុងឆ្នាំ២០២៤ ការចុះបញ្ជីគម្រោងវិនិយោគមានការកើនឡើងចំនួន២១៦ ស្មើនឹងប្រមាណ ៥២% ខណៈទំហំទុនវិនិយោគមានការកើនឡើងប្រមាណ ៣ប៊ីលានដុល្លារអាម៉េរិក ស្មើនឹង ប្រមាណ ៤៥%។ នេះបើយោងតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា។

ការទទួលបានការចុះបញ្ជីគម្រោងវិនិយោគសរុបចំនួន ៦៣០ គឺជាការបង្កើតកំណត់ត្រាថ្មីមួយទៀតរបស់កម្ពុជា ដែលនៅឆ្នាំ២០២៤ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (គ.វ.ក. នៃ ក.អ.ក.) បានបង្កើតកំណត់ត្រាថ្មីនៃការ ចុះបញ្ជីគម្រោងវិនិយោគម្តងរួចហើយ ដែលកាលណោះទទួលបានគម្រោងវិនិយោគចំនួន ៤១៤ គម្រោង។

ក្រុមប្រឹក្សាអភិវឌ្ឍន៍កម្ពុជា បញ្ជាក់ថាក្នុងចំណោមគម្រោងវិនិយោគ ៦៣០ មានទីតាំស្ថិតនៅ ក្រៅតំបន់សេដ្ឋកិច្ចពិសេសមានចំនួន ៣៨៧ និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ២៤៣។

បន្ថែមពីលើគម្រោងវិនិយោគដែលត្រូវបានចុះបញ្ជីនៅ គ.វ.ក. នៃ ក.អ.ក. នៅក្នុងឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា ក៏បានបញ្ជាក់ផងដែរថា អនុគណៈកម្មាធិការវិនិយោគរាជធានី-ខេត្ត បានសម្រេចចុះបញ្ជីគម្រោងវិនិយោគ សរុបចំនួន ២២៨គម្រោង ដែលមានទុនវិនិយោគសរុបប្រមាណ ៧៦៣លានដុល្លារអាម៉េរិក និងអាចបង្កើត ការងារបានប្រមាណ១០៦ពាន់កន្លែង។

គម្រោងវិនិយោគទាំង ២២៨ នេះសុទ្ធសឹងតែជាការវិនិយោគក្នុងវិស័យឧស្សាហកម្ម និងមានប្រភព ទុនវិនិយោគមកពីប្រទេសចិនប្រមាណ ៧២៨លានដុល្លារអាម៉េរិក, ក្នុងស្រុកប្រមាណ ២២,៦លានដុល្លារ អាម៉េរិក, អូស្ត្រាលីប្រមាណ ៥លានដុល្លារអាម៉េរិក, សិង្ហបុរីប្រមាណ ៣,៤លានដុល្លារអាម៉េរិក, សហរដ្ឋ អាម៉េរិកប្រមាណ ១,៥លានដុល្លារអាម៉េរិក, ម៉ាឡេស៊ីប្រមាណ ១លានដុល្លារ អាម៉េរិក និងជប៉ុនប្រមាណ ៦១ម៉ឺនដុល្លារអាម៉េរិក៕