ភ្នំពេញ៖ លោកស្រី Izumi Nakamitsu អគ្គលេខាធិការរងអង្គការសហប្រជាជាតិ និងជាតំណាងជាន់ខ្ពស់អង្គការសហប្រជាជាតិទទួលបន្ទុកនិសព្វាវុធការ ពាក់ព័ន្ធនឹងកិច្ចសហប្រតិបត្តិការសកម្មភាពមីន បានទទួលស្គាល់ពីកិច្ចខិតខំប្រឹងប្រែងរបស់កម្ពុជា ដែលនាំមកនូវសន្តិភាព និងការអភិវឌ្ឍន៍ប្រទេសជាតិ ហើយលោកស្រី បានចាត់ទុកកិច្ចការបោសសម្អាតមីន គឺជាបន្ទុកដ៏ធំរបស់កម្ពុជា ដែលត្រូវដោះស្រាយ។

ឯកឧត្តមទេសរដ្ឋមន្រ្តី លី ធុជ ក៏បានលើកឡើងក្នុងជំនួបជាមួយ លោកស្រី Izumi Nakamitsu អំពីភាពស្មុគស្មាញ និងបញ្ហាប្រឈមនានាចំពោះបញ្ហាមីនតាមបណ្តោយព្រំដែនកម្ពុជា-ថៃ ដែលកំពុងបង្កគ្រោះថ្នាក់ដល់ទាំងប្រជាជនស៊ីវិល និងកងកម្លាំងយោធា ព្រមទាំងត្រូវការពេលវេលា និងធនធានច្រើនសម្រាប់ដោះស្រាយ។ ប៉ុន្តែទោះបីយ៉ាងណា កម្ពុជា នឹងបន្តធ្វើការដោះស្រាយបញ្ហាប្រឈមទាំងនេះ តាមរយៈកិច្ចសហប្រតិបត្តិការ ការសន្ទនា និងផ្អែកលើទិដ្ឋភាពបច្ចេកទេស ជាមួយប្រទេសជិតខាង ដើម្បីធានាបាននូវសុខសុវត្ថិភាព។

ជាមួយគ្នានេះ ឯកឧត្តមទេសរដ្ឋមន្រ្តី លី ធុជ បានលើកឡើងអំពីកិច្ចខិតខំប្រឹងប្រែងរបស់កម្ពុជា ក្នុងការបោសសម្អាតមីន និងសំណល់ជាតិផ្ទុះពីសង្រ្គាម អស់រយៈពេលជាង ៣០ឆ្នាំមកនេះ។ កម្ពុជា បានប្រែក្លាយពីប្រទេសមួយ ក្នុងចំណោមប្រទេសដែលមានរងគ្រោះធ្ងន់ធ្ងរបំផុតដោយសារមីន ទៅជាប្រទេសឈានមុខគេក្នុងការបោសសំអាត ការគ្រប់គ្រងព័ត៌មាន និងការគាំទ្រជនរងគ្រោះដែលបន្តរស់រានមានជីវិត។ កម្ពុជា បន្តរួមចំណែកក្នុងការបោសសម្អាតមីន ក្រោមក្របខ័ណ្ឌរក្សាសន្តិភាពរបស់អង្គការសហប្រជាជាតិ ហើយប្រតិបត្តិករជាតិ-អន្តរជាតិប្រចាំកម្ពុជា ក៏បានចែករំលែកបទពិសោធ និងជំនាញរបស់ខ្លួនជាសកល តាមរយៈការបណ្តុះបណ្តាល ទស្សនកិច្ចសិក្សា និងកិច្ចសហប្រតិបត្តិការជាមួយប្រទេសរងគ្រោះដោយសារមីនផ្សេងទៀត៕