ភ្នំពេញ៖ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តឱ្យក្រុមហ៊ុន FUCHS Gruppe ពិនិត្យលទ្ធភាពជួយគាំទ្រកសិករ និងសហគមន៍កសិកម្ម ក្នុងការវិភាគជំងឺ និងសត្វល្អិតចង្រៃដោយឥតគិតថ្លៃ សំដៅកាត់បន្ថយថ្លៃដើមផលិត និងជំរុញទិន្នផលម្រេចកម្ពុជា។

ជាមួយគ្នានេះ ក្រុមហ៊ុន FUCHS បានបង្ហាញគោលជំហរគាំទ្រ រួមចំណែក និងជំរុញកិច្ចសហប្រតិបត្តិការល្អជាមួយគ្នា​ ទាំងការងារបច្ចេកទេសនិងបង្កើនទំហំនៃការវិនិយោគ សំដៅជួយគាំទ្រកសិផលម្រេចនិងគ្រឿងទេសកម្ពុជា និងជំរុញការនាំចេញទៅកាន់ទីផ្សារអន្តរជាតិ។

ក្នុងជំនួបនេះ ឯកឧត្តម តូច ប៊ុនហួរ បានណែនាំឱ្យក្រុមហ៊ុន FUCHS សហការជាមួយនាយកដ្ឋានជំនាញនៃក្រសួងកសិកម្ម រុក្ខាប្រមាញ់ និងនេសាទ ដើម្បីពិនិត្យ តាមដាន និងវាយតម្លៃពីការប្រើប្រាស់ថ្នាំកម្ចាត់សត្វល្អិតឲ្យបានត្រឹមត្រូវ ស្របតាមលក្ខខណ្ឌតម្រូវរបស់ប្រទេសនាំចូល ជាពិសេសសហភាពអឺរ៉ុប៕