ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នឹងរៀបចំផែនការគ្រប់គ្រងច្បាស់លាស់ គាំទ្រផលិតកម្មបន្លែក្នុងស្រុកឱ្យបានពេញមួយឆ្នាំ និងបង្ហាញពីការ​ប្តេជ្ញា​ចិត្តក្នុងការធានាឱ្យបន្លៃមានគុណភាព និងសុវត្ថិភាព កាត់បន្ថយការ​ពឹងផ្អែក​លើបន្លែនាំចូល តាមរយៈការលើកកម្ពស់ផលិតកម្មក្នុងស្រុក។

ក្នុងកិច្ចប្រជុំពិភាក្សាអំពីប្រភេទនិងបរិមាណតម្រូវការបន្លែ និងលទ្ធភាព​ផ្គត់ផ្គង់​បន្លែក្នុងស្រុក ទល់នឹងបរិមាណបន្លែនាំចូល ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការ ក្រសួងកសិកម្ម បានដាក់ចេញនូវវិធានការ​សំខាន់ៗមួយ​ចំនួនដូចជា៖ ពង្រឹងការស្តារ និងអភិវឌ្ឍន៍ស្ថានីយ៍ស្រាវជ្រាវពូជបន្លែ, អភិវឌ្ឍន៍​ហេដ្ឋារចនាសម្ព័ន្ធស្រោចស្រព និងបណ្តុះបណ្តាល​បច្ចេកទេស​ដល់កសិករ, ជំរុញការបង្កើតសហគមន៍កសិកម្មទំនើប និងសហ​វិនិយោគ។ ជាមួយគ្នានេះ ត្រូវកំណត់តំបន់ដាំដុះបន្លែសមស្រប​តាមតំបន់ក្សេត្របរិស្ថាន ផលិត​បន្លែតាមស្តង់ដារសុវត្ថិភាព (CAM-GAP, PGS) និងចងកិច្ច​សន្យា​ផ្គត់ផ្គង់ និងផ្តល់ព័ត៌មានទីផ្សារទៀងទាត់។

ឯកឧត្ដមបណ្ឌិត ហ៊ាន វណ្ណហន បានបញ្ជាក់ថា កា​រ​ពង្រឹង​សមត្ថភាពមន្ត្រីកសិកម្មឃុំ លើផ្នែកដំណាំសាកវប្បកម្ម គឺមាន​សារ​សំខាន់ ដើម្បីឱ្យមន្រ្តីកសិកម្មឃុំក្លាយជាសេនាធិការ​ដ៏សំខាន់​នៅមូលដ្ឋានជួយពលរដ្ឋលើការងារនេះ៕