ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកែប បានព្រលែងអណ្តើកសមុទ្រចំនួន ២ក្បាល ចូលសមុទ្រវិញ ក្រោយទទួលបានពីប្រជានេសាទរស់នៅកោះពោធិ៍ ក្នុងខេត្តកែប កាលពីថ្ងៃទី១៨ ខែវិច្ឆិកា ឆ្នាំ២០២៥។

បើតាមការបញ្ជាក់ពីខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកែប អណ្តើកសមុទ្រទី១ ជាអណ្តើកញីមាន ទម្ងន់ ៦០គីឡូក្រាម បណ្ដោយប្រវែង ៧១សង់ទីម៉ែត្រ ទទឹងប្រវែង ៣៨សង់ទីម៉ែត្រ បានកឹបស្លាកលេខ KH 2088 និងអណ្ដើកសមុទ្រទី២ ជាអណ្តើកឈ្មោល មានទម្ងន់ ១៤គីឡូក្រាម បណ្ដោយប្រវែង ៥១សង់ទីម៉ែត្រ ទទឹងប្រវែង ៤៨សង់ទីម៉ែត្រ បានកឹបស្លាកលេខ KH 2089។

គួរបញ្ជាក់ថា មួយរយ:ចុងក្រោយនេះ អ្នកនេសាទ តែងតែប្រទះនិងចាប់បានដោយចៃដន្យនូវពពួកសត្វសមុទ្រកម្រៗជាច្រើនប្រភេទ និងបានប្រគល់ជូនកម្លាំងជំនាញ ដើម្បីលែងចូលក្នុងសមុទ្រវិញ ដែលនេះសបញ្ជាក់ពីការយល់ដឹងរបស់ប្រជានេសាទខេត្តកែបផ្ទាល់ និងស្មារតីក្នុងការចូលរួមអភិរក្សធនធានសមុទ្រកម្រជាមួយអាជ្ញាធរខេត្ត៕