ភ្នំពេញ៖ រយៈពេល ១០ខែ ក្នុងឆ្នាំ២០២៥ បរិមាណកុងតឺន័រ ដែលបានឆ្លងកាត់កំពង់ផែស្វយ័តភ្នំពេញមានចំនួន ៤៨៨ ២៥៩ទូ (TEUs) មានការកើនឡើងចំនួន ២១,៦៨% បើធៀបនឹងរយៈពេលដូចគ្នានៅឆ្នាំ២០២៤ ដែលមានចំនួនកុងតឺន័រ ៤០១ ២៥១ទូ។ នេះបើតាមការចុះផ្សាយរបស់កំពង់ផែស្វយ័តភ្នំពេញ កាលពីថ្ងៃទី១៣ ខែវិច្ឆិកា ឆ្នាំ២០២៥។

កំពង់ផែស្វយ័តភ្នំពេញ បានឱ្យដឹងថា ក្នុងរយៈពេល ១០ខែនេះ បរិមាណនាវា ដែលបានដឹកអ្នកដំណើរចូលចតចំណតផែ មានចំនួន ៣១៩គ្រឿង កើនឡើង ៤,៩៣% ដែលក្នុងនោះ មានអ្នកដំណើរដែលបានឆ្លងកាត់ចំនួន ៣០ ៧៨៤នាក់ កើនឡើង ១០% ធៀបនឹងរយៈពេល ១០ខែក្នុងឆ្នាំ២០២៤។

ចំពោះ បរិមាណទំនិញ-ប្រេងឥន្ធនៈ ដែលបានឆ្លងកាត់កំពង់ផែស្វយ័តភ្នំពេញវិញ មានចំនួន ៤ ៦១៨ ៦៧៧តោន កើនឡើងបាន ១៦,៤៧% បើធៀបនឹងរយៈពេលដូចគ្នាក្នុងឆ្នាំ២០២៤ ដែលមានចំនួន ៣ ៩៦៥ ៦១៩តោន។ គួរបញ្ជាក់ថា លទ្ធផលការងារអាជីវកម្ម សេវាកម្ម ដែលកំពង់ផែស្វយ័តភ្នំពេញអនុវត្តក្នុងរយៈពេល ១០ខែ គឺពុំទាន់ធ្វើសវនកម្មទេ៕