ភ្នំពេញ៖ គិតត្រឹមថ្ងៃទី២១ ខែកុម្ភៈ ឆ្នាំ២០២៤ គម្រោងសាងសង់«អាកាសយានដ្ឋានអន្តរជាតិតេជោ» លំដាប់ថ្នាក់4F ដំណាក់កាលទី១ សម្រេចបានការសាងសង់បានចំនួន ៦៦,១% ហើយ និងបាន ចំណាយទឹកប្រាក់អស់ ៩៦១លានដុល្លារ នៃគម្រោងទឹកប្រាក់វិនិយោគសរុបចំនួន ១៥០០លានដុល្លារ។

ក្នុងពិធីសំណេះសំណាល និងចុះត្រួតពិនិត្យវឌ្ឍនភាព នៃគម្រោងអភិវឌ្ឍន៍សាងសង់អាកាសយានដ្ឋានអន្តរជាតិតេជោ លំដាប់ថ្នាក់4F ដំណាក់កាលទីមួយ នាថ្ងៃទី១២ មីនា ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានគូសបញ្ជាក់ក្នុងរបាយការណ៍ថា ហេដ្ឋារចនាសម្ព័ន្ធសំខាន់ៗ នៅក្នុងអាកាសយានដ្ឋានអន្តរជាតិតេជោ ដែលសម្រេចបានមានអគារស្ថានីយអ្នកដំណើរ សម្រេចបាន ៥៦,៨% ។ 

ចំពោះ ហេដ្ឋារចនាសម្ព័ន្ធហោះហើរ សម្រេចបាន ៦៤,៤%, អគារបញ្ហាចរាចរណ៍ដែនអាកាស សម្រេចបាន ១០០%, មជ្ឈមណ្ឌលផ្គត់ផ្គង់ថាមពល សម្រេចបាន ៧៦.៨%, ការភ្ជាប់បណ្ដាញទឹក-ភ្លើង ពីប្រភពដើមចូលមកអាកាសយានដ្ឋានអន្តរជាតិតេជោ សម្រេចបាន ៨៥%, សំណង់អគារទ្រទ្រង់ប្រតិបត្តិការអាកាស និងប្រតិបត្តិការផ្ទៃដីសម្រេចបាន ៦០% ។ 

នាឱកាសនោះ ឯកឧត្តមបណ្ឌិត ម៉ៅ ហាវណ្ណាល់ បានបន្ថែមថា អាកាសយានដ្ឋានអន្តរជាតិតេជោ លំដាប់4F ដំណាក់កាលទី១ គ្រោងនឹងបើកដំណើរការនៅឆមាសទី១ ឆ្នាំ២០២៥ ខាងមុខនេះ។ ជាមួយគ្នានេះ សម្តេចធិបតី ហ៊ុន ម៉ាណែត បានលើកឡើងថា ការដ្ឋានសាងសង់នេះ ប្រើកម្លាំងពលកម្មប្រមាណ ៨ពាន់នាក់ ហើយអាកាសយានដ្ឋានអន្តរជាតិតេជោ នឹងជួយបង្កើនការងារជូនប្រជាពលរដ្ឋ និងជំរុញកំណើនសេដ្ឋកិច្ចជាតិ៕