ភ្នំពេញ៖ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ចូលរួមជាវាគ្មិនក្នុងកម្មវិធីបើកកិច្ចប្រជុំកំពូល Bosphorus លើកទី១៦ ក្រោមប្រធានបទ «Global Challenges: Adjusting to New Realities» ដើម្បីបង្កើនវត្តមានកម្ពុជាលើឆាកអន្តរជាតិ លើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្ម ពង្រឹងភាពជាដៃគូជាមួយថ្នាក់ដឹកនាំពិភពលោក ព្រមទាំងស្វែងយល់ពីកាលានុវត្តភាពថ្មីៗសម្រាប់ការអភិវឌ្ឍប្រកបដោយចីរភាព។

ក្នុងព្រឹត្តិការណ៍ ដែលប្រព្រឹត្តទៅចាប់ពីថ្ងៃទី៦-៧ ខែវិច្ឆិកា ឆ្នាំ២០២៥ នៅទីក្រុងអ៊ីស្តង់ប៊ុលនៃសាធារណរដ្ឋតួកគីយ៉េ លោកជំទាវ តឹករ៉េត កំរង បានថ្លែងពីបទពិសោធរបស់កម្ពុជា ក្នុងការរក្សាសន្តិភាព និងការអភិវឌ្ឍប្រកបដោយនិរន្តរភាព និងភាពធន់ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា តាមរយៈការធ្វើពិពិធកម្មសេដ្ឋកិច្ច ឌីជីថលូបនីយកម្ម និងការធ្វើសមាហរណកម្មពាណិជ្ជកម្ម ព្រមទាំងការលើកកម្ពស់វិស័យទេសចរណ៍ តាមរយៈការកសាងហេដ្ឋារចនាសម្ព័ន្ធថ្មីៗ។

កិច្ចប្រជុំកំពូល Bosphorus លើកទី១៦ រៀបចំដោយស្ថាប័ន International Cooperation Platform (ICP) ដោយមានសមាសភាពចូលរួមពីថ្នាក់ដឹកនាំ និងធុរជនសំខាន់ៗមកពីបណ្ដាប្រទេសចំនួនជាង៦០ ទូទាំងពិភពលោក សរុបប្រមាណ ២ពាន់រូប៕