ភ្នំពេញ៖ បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា ស្នើឱ្យលោក ភួង រ័ត្ននា ដែលទទួលបានការគាំទ្រធ្វើជាប្រធាន ការិយាល័យតំណាងសភាពាណិជ្ជកម្មកម្ពុជានៅទីក្រុង អាឌឺឡែត ប្រទេសអូស្ត្រាលី អាណត្តិទី១ លើកទី១ សហការជាមួយ ស្ថាប័នរដ្ឋាភិបាលអូស្ត្រាលី ស្ថាប័នពាណិជ្ជកម្មអូស្រ្តេត (Austrade) សភាពាណិជ្ជកម្មតាមរដ្ឋនីមួយៗរបស់អូស្ត្រាលី និងសភាពាណិជ្ជកម្ម និងឧស្សាហកម្មអូស្ត្រាលី ដើម្បីលើកកម្ពស់វិបុលភាពយូរអង្វែងកម្ពុជា-អូស្ត្រាលី និងជំរុញពាណិជ្ជកម្ម និងវិនិយោគរវាងប្រទេសទាំងពីរ។

បណ្ឌិត តាន់ មុនីវណ្ណ បានគូសបញ្ជាក់ថា ការបង្កើតការិយាល័យតំណាងនេះ គឺជាដំណាក់កាលដ៏សំខាន់មួយក្នុងការតភ្ជាប់សេដ្ឋកិច្ចកម្ពុជា ជាមួយប្រទេសអូស្ត្រាលីភាគខាងត្បូង ជាពិសេសលើវិស័យបច្ចេកវិទ្យា និងវិស័យដែលមានតម្លៃបន្ថែមខ្ពស់។ ការិយាល័យតំណាងសភាពាណិជ្ជកម្មកម្ពុជានៅទីក្រុងអាឌឺឡែតនេះ គឺជាការិយាល័យតំណាងទី៣ នៅប្រទេសអូស្ត្រាលី បន្ទាប់ពីការិយាល័យនៅ ទីក្រុងមែលប៊ន និង ទីក្រុងស៊ីដនី ដែលបានបង្កើតឡើងកាលពីឆ្នាំ២០២៣។ ការិយាល័យទាំងនេះ នឹងចូលរួមលើកកម្ពស់ភាពជាដៃគូសេដ្ឋកិច្ចរវាងប្រទេសកម្ពុជា និងអូស្រ្តាលីឱ្យកាន់តែរឹងមាំ៕