ភ្នំពេញ៖ ជំនួបផ្គូផ្គងរវាងសមាគមអ្នកផលិតចំណីអាហារកម្ពុជា សិប្បកម្ម និងសហគ្រាសធុនតូច និងមធ្យម (SMEs) ជាមួយសមាគមសហគមន៍ចុងភៅកម្ពុជា, សមាគមសណ្ឋាគារនៅកម្ពុជា, ផ្សារទំនើប ម៉ាត និងមីនីម៉ាត ពិតជាមានសារៈសំខាន់ណាស់ ដែលនឹងផ្តល់ឱកាសឱ្យសិប្បកម្មផលិតក្នុងស្រុក បានផ្សព្វផ្សាយនូវផលិតផលរបស់ខ្លួន។ នេះគឺជាការលើកឡើងរបស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ក្នុងការអញ្ជើញចូលរួមជាអធិបតីក្នុង កិច្ចជំនួបផ្គូផ្គង រវាងសមាគមខាងលើ។

ថ្លែងក្នុងកិច្ចជំនួបផ្គូផ្គងនៅថ្ងៃទី១ ខែវិច្ចិកា ២០២៥ លោកជំទាវ ចម និម្មល រំពឹងថាជំនួបនេះនឹង ផ្តល់ឱកាសឱ្យសិប្បកម្មផលិតក្នុងស្រុក បានផ្សព្វផ្សាយនូវផលិតផលរបស់ខ្លួន និងជួបប្រាស្រ័យទាក់ទងផ្ទាល់ជាមួយតំណាងផ្សារទំនើប ម៉ាត និងមីនីម៉ាត សមាគមសណ្ឋាគារ និងសមាគមសហគមន៍ចុងភៅកម្ពុជាដើម្បីអាចពិភាក្សាគ្នា និងផ្សារភ្ជាប់ព័ត៌មានទីផ្សារ ធ្វើយ៉ាងណាអាចបង្កើនការលក់ផលិតផលក្នុងស្រុក សំដៅជំរុញបន្ថែមទៀតនូវចលនាប្រើប្រាស់ផលិតផលខ្មែរ។

បើតាមក្រសួងពាណិជ្ជកម្ម លោកជំទាវរដ្ឋមន្រ្តី បញ្ជាក់ថាក្រសួង បានពិនិត្យរៀបចំជំនួបផ្គូផ្គងជារៀងរាល់ ៣ ខែម្តង ដោយចាប់ផ្តើមពីរាជធានី ខេត្តសំខាន់ៗ ការលើកកម្ពស់ការយល់ដឹងអំពីការប្រើប្រាស់ផលិតផលដល់អតិថិជនអ្នកប្រើប្រាស់ និងលើកទឹកចិត្តដល់ផ្សារទំនើបនានាបង្កលក្ខណៈអំណោយផលដល់ការចូលដាក់តាំងលក់ផលិតផលខ្មែរជាដើម។

កិច្ចជំនួបនៅទីស្តីការក្រសួងពាណិជ្ជកម្ម ដែលមានការចូលរួមពីរដ្ឋមន្រ្តីក្រសួង តំណាងសិប្បកម្មផលិតក្នុងស្រុក សមាគមសណ្ឋាគារ និងសមាគមសហគមន៍ចុងភៅកម្ពុជា និងផ្សារទំនើប ម៉ាត និងមីនីម៉ាត សរុបប្រមាណ ២៥០ នាក់។ លោកជំទាវ ចម និម្មល ចាត់ទុកវត្តមានរបស់ ថ្នាក់ដឹកនាំក្រសួងនិងតំណាងពីវិស័យឯកជនទាំងអស់គឺបាន ឆ្លុះបញ្ចាំងឱ្យឃើញពីស្មារតី និងឆន្ទៈរួមចំណែកជាមួយរាជរដ្ឋាភិបាលក្នុងការរួមគ្នាលើកកម្ពស់ផលិតផលខ្មែរ៕