ភ្នំពេញ៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ ណែនាំឱ្យនិស្សិតជ័យលាភីអាហារូបករណ៍ប្រទេសអូស្ត្រាលី (Australia Awards) ឆ្នាំសិក្សា២០២៦-២០២៧ ធ្វើជាទូតសុឆន្ទៈរបស់កម្ពុជាលើឆាកអន្តរជាតិ ដោយត្រូវហ៊ានការពារកេរ្តិ៍ឈ្មោះ កិត្តិយស និងវប្បធម៌ដ៏ល្អរបស់ខ្មែរ។

ក្នុងជំនួបនៅទីស្ដីការក្រសួងការងារជាមួយនិស្សិតជ័យលាភីអាហារូបករណ៍ប្រទេសអូស្ត្រាលី លោកជំទាវ សុវណ្ណ វណ្ណារតន៍ ក៏បានជំរុញឱ្យនិស្សិតទាំងអស់ ត្រូវខិតខំសិក្សារៀនសូត្រ ដើម្បីគោលបំណង និងអនាគតរបស់ខ្លួន ក៏ដូចជាយកចំណេះដឹងមកជួយអភិវឌ្ឍន៍ជាតិ។ ជាមួយគ្នានេះ លោកជំទាវរដ្ឋលេខាធិការ បានលើកឡើងពីបេសកកម្មរបស់ក្រសួងការងារ ដែលផ្តោតទៅលើវិស័យ ៣សំខាន់ៗ រួមមាន៖ វិស័យការងារ វិស័យសន្តិសុខសង្គម និងវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ។

សូមជម្រាបថា អាហារូបករណ៍ប្រទេសអូស្ត្រាលី គឺជាផ្នែកមួយនៃកម្មវិធីជំនួយអភិវឌ្ឍន៍របស់រដ្ឋាភិបាលអូស្ត្រាលី ដែលមានបំណងគាំទ្រដល់ការរីកចម្រើនរបស់កម្ពុជា និងជំរុញទំនាក់ទំនងរវាងប្រជាជន និងប្រជាជននៃប្រទេសទាំងពីរ។ និស្សិតជ័យលាភីអាហារូបករណ៍ប្រទេសអូស្ត្រាលី (Australia Awards) ឆ្នាំសិក្សា២០២៦-២០២៧ មានចំនួន៥៥នាក់ ដោយក្នុងនោះថ្នាក់បរិញ្ញាបត្រជាន់ខ្ពស់ចំនួន ៥៣នាក់ និងថ្នាក់បណ្ឌិតចំនួន ២នាក់៕