ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម នឹងចុះអង្កេតនៅតាមបណ្តាទីផ្សារ ផ្សារទំនើប និងទីតាំងធ្វើអាជីវកម្មនានាទូទាំងប្រទេស លើការចែកចាយ ផលិត និងស្តុកឧបករណ៍អេឡិចត្រូនិកនិងសារធាតុគីមីសម្រាប់ជក់ និងស៊ីស្សា។

ពាក់ព័ន្ធនឹងការអនុវត្តខាងលើនេះ ក.ប.ប. បានអំពាវនាវឱ្យក្រុមហ៊ុន សហគ្រាស សិប្បករ ពាណិជ្ជករ អាជីវករ និងសាធារណជន ចូលរួមសហការឱ្យបានម៉ឺងម៉ាត់នូវបទបញ្ជារបស់រាជរដ្ឋាភិបាល ប្រកបដោយ ប្រសិទ្ធភាព។ នេះបើតាមសេចក្តីជូនដំណឹងរបស់ ក.ប.ប. ចេញផ្សាយនាថ្ងៃទី២៨ ខែតុលា ឆ្នាំ២០២៥។

គួរបញ្ជាក់ថា ការអនុវត្តនេះ គឺស្របតាមបទបញ្ជា លេខ ០២ បប របស់រាជរដ្ឋាភិបាល ចុះថ្ងៃទី២១ ខែតុលា ឆ្នាំ២០២៥ ស្តីពីការការដាក់វិធានការហាមឃាត់ការនាំចូល ការចែកចាយ ការលក់ ការផ្សាយពាណិជ្ជកម្ម ការប្រើប្រាស់ ការកាន់កាប់ ការផលិត និងការស្តុកទុកឧបករណ៍ អេឡិចត្រូនិកនិងសារធាតុគីមីសម្រាប់ជក់ និងស៊ីស្សា៕