ភ្នំពេញ៖ សេចក្ដីព្រាងក្របខ័ណ្ឌទស្សនាទានស្ដីពីយុទ្ធសាស្រ្តជំរុញវិនិយោគ ក្រោមកិច្ចសហការរវាងគណៈកម្មាធិការវិនិយោគកម្ពុជា(គ.វ.ក.) នៃក្រុមប្រឹក្សាអភិវឌ្ឍន៍កម្ពុជា(ក.អ.ក.) និងកម្មវិធីភាពជាដៃគូរវាងកម្ពុជា-អូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់(CAPRED) នឹងក្លាយឯកសារមគ្គុទ្ទេសក៍សម្រាប់បង្កើនការទាក់ទាញវិនិយោគដោយផ្ដោតសំខាន់លើវិស័យអេឡិចត្រូនិក និងកសិ-ឧស្សាហកម្ម ដែលជាវិស័យអាទិភាព។

ការបង្កើនការទាក់ទាញវិនិយោគនេះ គឺដើម្បីរួមចំណែកក្នុងការលើកកម្ពស់ពិពិធកម្មមូលដ្ឋានឧស្សាហកម្មនៅកម្ពុជា ហើយក៏ជាមគ្គុទ្ទេសក៍សម្រាប់ការរៀបចំឯកសារយុទ្ធសាស្ត្រផ្ទៃក្នុងរបស់ ក.អ.ក. សំដៅបន្តពង្រឹងប្រសិទ្ធភាពស្ថាប័ន ក្នុងនាមជាសេនាធិការរបស់រាជរដ្ឋាភិបាលលើការជំរុញទាក់ទាញវិនិយោគឯកជនផងដែរ។

ជាមួយគ្នានេះ អ្នកជំនាញ ក៏គ្រោងរៀបចំកែសម្រួលចុងក្រោយ ដើម្បីគោរពរាយការណ៍ជូនថ្នាក់ដឹកនាំ ក.អ.ក. ពិនិត្យ និងផ្តល់ការអនុម័តដ៏ខ្ពង់ខ្ពស់ លើសេចក្តីព្រាងក្របខ័ណ្ឌទស្សនាទាននេះផងដែរ៕