ភ្នំពេញ៖​ ក្រុមការងារជំរុញការនាំចេញកម្ពុជា និងអង្គភាព sequa gGmbH/ Promotion Desk (IPD) នឹងរួមគ្នាលើកកម្ពស់ផលិតផលកែច្នៃកសិកម្ម និងអាហារកែច្នៃរបស់កម្ពុជា ឱ្យឈានចូលទីផ្សារអន្តរជាតិ តាមរយៈការពង្រឹងផ្អែកលើគុណភាព ស្តង់ដារ និងភាពច្នៃប្រឌិត។​ នេះបើតាមការពិភាក្សាគ្នារវាងឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ, Dr. Doktor René Vossen នាយកទូទៅនៃអង្គភាព sequa gGmbH និងលោកស្រី Doktor Julia Bellinghausen ប្រធានគម្រោង IPD។

ក្នុងជំនួបពិភាក្សាគ្នា កាលពីថ្ងៃទី០៦ ខែតុលា ឆ្នាំ២០២៥ នេះ​ ធ្វើឡើងក្នុងគោលបំណងពង្រឹងកិច្ចសហប្រតិបត្តិការរវាងក្រុមការងារជំរុញការនាំចេញ និងអង្គភាព sequa/IPD ដើម្បីទាញយកការគាំទ្រផ្នែកបច្ចេកទេស សំដៅជំរុញផលិតផលនាំចេញរបស់កម្ពុជាឱ្យមានសមត្ថភាពប្រកួតប្រជែង និងអនុលោមតាមស្តង់ដារអន្តរជាតិ ព្រមទាំងដើម្បីអភិវឌ្ឍកម្មវិធីជំរុញការនាំចេញនានា និងការពង្រឹងសមត្ថភាពក្រុមហ៊ុនក្នុងការនាំចេញទៅកាន់ទីផ្សារអឺរ៉ុប ផងដែរ។

លើសពីនេះ ឯកឧត្តម សំហេង បូរ៉ា ក៏បានបន្តដឹកនាំគណប្រតិភូមកម្ពុជាចូលរួមក្នុងសន្និសីទស្រូវអន្តរជាតិលើកទី៧ (7th Eurofins ANUGA Rice Conference 2025) នៅសាលពិព័រណ៍ ANUGA ដើម្បីពិភាក្សាអំពីឱកាស និងបញ្ហាប្រឈមនៃពាណិជ្ជកម្មស្រូវអង្ករអន្តរជាតិ៕