ភ្នំពេញ៖ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចុះបញ្ជីគម្រោងវិនិយោគចំនួន ៥៤៦គម្រោង ក្នុងទំហំទុនវិនិយោគសរុបប្រមាណ ៧,៨ប៊ីលានដុល្លារ ក្នុងរយៈពេល ៩ខែ នៃឆ្នាំ២០២៥ ដែលមានគម្រោងវិនិយោគមានការកើនឡើងចំនួន ២៣១គម្រោង ស្មើនឹងប្រមាណ ៧៣% ខណៈទុនវិនិយោគមានការកើនឡើងប្រមាណ ២,៥ប៊ីលានដុល្លារ ស្មើនឹងប្រមាណ ៤៧% បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ដែល CDC បានចុះបញ្ជីគម្រោងវិនិយោគត្រឹមតែ ៣១៥គម្រោង ក្នុងទំហំទុនវិនិយោគប្រមាណ ៥,៣ប៊ីលានដុល្លារអាម៉េរិក។

រយៈពេល ៩ខែនេះ CDC បានចុះបញ្ជីគម្រោងវិនិយោគលើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ទៅ ១៣២គម្រោង។ ចំពោះ ក្នុងខែកញ្ញា ឆ្នាំ២០២៥ CDC បានចុះបញ្ជីគម្រោងវិនិយោគសរុបចំនួន ៥៥គម្រោង ក្នុងទំហំទុនវិនិយោគសរុបប្រមាណ ៤៦៧លានដុល្លារ និងអាចបង្កើតការងារបានប្រមាណ ៣៧ពាន់កន្លែង។ ក្នុងចំណោមគម្រោងវិនិយោគសរុបចំនួន ៥៥នេះ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៣៨គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១៧គម្រោង។

លើសពីនេះ គម្រោងវិនិយោគដែលមានភាពលេចធ្លោប្រចាំខែកញ្ញា ឆ្នាំ២០២៥ រួមមាន៖ គម្រោងវិនិយោគបង្កើតរោងចក្រកែច្នៃដំឡូងមី និងផលិតផលជី មានទីតាំងនៅស្រុកស្ទោង ខេត្តកំពង់ធំ មានទំហំទុនវិនិយោគប្រមាណ ២០លានដុល្លារ និងបង្កើតការងារ ៩០កន្លែង, គម្រោងវិនិយោគបង្កើតរោងចក្រផ្គុំដំឡើងរថយន្ត មានទីតាំងស្រុកកំពង់ត្រឡាច ខេត្តកំពង់ឆ្នាំង ដែលមានទំហំទុនវិនិយោគប្រមាណ ១៩លានដុល្លារ និងបង្កើតការងារបាន ១ ១៤២កន្លែង និងគម្រោងវិនិយោគបង្កើតរោងចក្រវាយនភ័ណ្ឌ កាត់ដេរ និងផលិតផលពាក់ព័ន្ធនឹងវាយនភ័ណ្ឌ ដែលស្ថិតនៅតំបន់សេដ្ឋកិច្ចពិសេស ឈីលូ ជាន ពុ ចាយ ស្ថិតនៅខេត្តស្វាយរៀង មានទំហំទុនវិនិយោគប្រមាណ ៣០លានដុល្លារ ដែលបង្កើតការងារ ១ ០៧៨កន្លែង៕