ភ្នំពេញ៖ និយ័តករមូលបត្រកម្ពុជា (ន.ម.ក.) និងសាជីវកម្មហិរញ្ញប្បទានមូលបត្រកូរ៉េ (KSFC) ចុះហត្ថលេខាបន្តអនុវត្ត អនុស្សរណៈនៃការយោគយល់គ្នា (MoU) កាលពីឆ្នាំ២០១៨ ដោយរក្សានូវខ្លឹមសារទាំងស្រុង និងបង្កើតនូវកិច្ចសហប្រតិបត្តិការមួយដែលឆ្លើយតបនឹងតម្រូវការជាក់ស្តែង និងនិន្នាការវិវត្តន៍នៃវិស័យជាសាកល ព្រមទាំងបង្កើតយន្តការសម្រាប់កិច្ចសហប្រតិបត្តិការរយៈពេលវែង។

អនុស្សរណៈនៃការយោគយល់គ្នានេះ ដើម្បីជំរុញទំនាក់ទំនងបន្ត និងបង្កើនផលប្រយោជន៍សម្រាប់ទីផ្សារមូលបត្រ នៅក្នុងប្រទេសកម្ពុជា និងប្រទេសកូរ៉េ ពិសេសមានវិសាលភាពគ្រប់ដណ្តប់លើការចែករំលែកព័ត៌មានទីផ្សារ ការកសាងសមត្ថភាពមន្ត្រី តាមរយៈការចុះទស្សនកិច្ចសិក្សា ការចុះហ្វឹកហាត់ការងារដល់ទីកន្លែង និងវគ្គបណ្តុះបណ្តាល ព្រមទាំងការគាំទ្រការអភិវឌ្ឍហិរញ្ញប្បទានមូលបត្រ រួមទាំងការអភិវឌ្ឍក្របខ័ណ្ឌបទប្បញ្ញត្តិពាក់ព័ន្ធនឹងអាជីវកម្មហិរញ្ញប្បទានមូលបត្រ ដែល ន.ម.ក.កំពុងរៀបចំ។

ក្នុងសនិ្នសីទអន្តរជាតិគម្រប់ខួប ៧០ឆ្នាំ របស់ KSFC ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. បានលើកឡើងថា ការធ្វើបច្ចុប្បន្នកម្ម MoU រវាង ន.ម.ក. និង KSFC គឺជាស្ពានយុទ្ធសាស្ត្រ និងជាការឆ្លុះបញ្ចាំងពីចក្ខុវិស័យរួមគ្នារបស់ស្ថាប័នទាំងពីរ ក្នុងការជំរុញការអភិវឌ្ឍវិស័យមូលបត្រនៅកម្ពុជា និងកូរ៉េ តាមរយៈយន្តការហិរញ្ញប្បទានមូលបត្រ។ តាមរយៈការពង្រឹងកិច្ចសហប្រតិបត្តិការនេះ ស្ថាប័នទាំងពីរ អាចទទួលផលប្រយោជន៍លើនវានុវត្តន៍បទប្បញ្ញត្តិ និងជាពិសេសការកសាងសមត្ថភាព តាមរយៈការចុះហ្វឹកហាត់ការងារដល់ទីកន្លែង កិច្ចសហការរៀបចំកម្មវិធីបណ្តុះបណ្តាល និងការចែករំលែកជំនាញ ដែលអាចពង្រឹងសមត្ថភាពស្ថាប័ន បង្កើនទំនុកចិត្តទីផ្សារ និងជាមូលដ្ឋានសម្រាប់កំណើនសេដ្ឋកិច្ចរយៈពេលវែង៕