ភ្នំពេញ៖ ក្រុមការងារក្រសួងកសិកម្ម រុក្ខាប្រមាញ់ និងនេសាទ កំពុងសិក្សាជាមួយថ្នាក់ដឹកនាំ «សហគមន៍កសិកម្មក្រងតេះ» នៅខេត្តមណ្ឌលគីរី ពិនិត្យលទ្ធភាពប្រែក្លាយខ្លួនទៅជាសហគមន៍កសិកម្មទំនើប ដោយគ្រោងនឹងបន្ថែមដំណាំម្រេច និងកាហ្វេ ទៅក្នុងផែនការអាជីវកម្ម។

សហគមន៍កសិកម្មក្រងតេះ កំពុងទទួលបានការគាំទ្រដោយផ្ទាល់ពីគម្រោងពិពិធកម្មកសិកម្មកម្ពុជានៃក្រសួងកសិកម្ម ក្នុងទំហំទឹកប្រាក់សរុបជាង ២លានដុល្លារ ដើម្បីពង្រឹងសមត្ថភាពដាំដុះផ្លែស្រកានាគ និងស្លឹកមន ក៏ដូចជាវិនិយោគលើការកសាងប្រព័ន្ធស្រោចស្រព និងផ្លូវកៅស៊ូជិត ១០គីឡូម៉ែត្រផងដែរ។

សូមជម្រាបថា «សហគមន៍កសិកម្មក្រងតេះ» សហគមន៍កសិកម្មតែមួយគត់ ដែលមានជំនាញដាំផ្លែស្រកានាគ និងផលិតស្លឹកមននៅខេត្តមណ្ឌលគីរី ហើយដែលមានសមាជិកភាគច្រើនជាជនជាតិភាគតិច៕