ភ្នំពេញ៖ ឯកឧត្តម ហេង រតនា អគ្គនាយកស៊ីម៉ាក-CMAC ឆ្លើយតបទាក់ទងនឹងសំណួរ កន្លងមកមានអ្នកស្នើសុំឱ្យបកស្រាយ ដោយចោទជាសំណួរថា «ធ្វើយ៉ាងម៉េចបានដឹងថា គ្រាប់បែកទម្លាក់ពីយន្តហោះ ឬគ្រាប់បាញ់ផ្លោងពីសម័យសង្គ្រាមមុនៗ និងគ្រាប់បែកទម្លាក់ពីយន្តហោះឬគ្រាប់បាញ់ផ្លោងក្នុងសង្គ្រាមតាមព្រំដែនថ្មីៗនេះ?»

ពាក់ពន្ធ័នឹងសំណួរខាងលើ ឯកឧត្តម ហេង រតនា បានពន្យល់ថា គ្រាប់បែកទម្លាក់ពីយន្តហោះក្តី ឬគ្រាប់កាំភ្លើងធំក្តី សុទ្ធតែមានលេខកូដសម្គាល់ខែឆ្នាំផលិត ឬប្រទេស/ក្រុមហ៊ុនផលិត បន្ថែមលើសនេះសម្រាប់កម្ពុជា រាជរដ្ឋាភិបាលបានពង្រឹងសមត្ថភាពអង្គភាពCMAC ក្នុងការធ្វើការសិក្សាស្រាវជ្រាវព័ត៌មាននិងរៀបចំទិន្នន័យការទម្លាក់គ្រាប់បែកក្នុងសម័យសង្គ្រាមអតីតកាលបានយ៉ាងច្បាស់លាស់ ដោយមានកំណត់ត្រាព័ត៌មានពាក់ពន្ធ័ការទម្លាក់គ្រាប់បែកពីយន្តហោះ ដូចជាកាលបរិច្ឆេទ ប្រភេទយន្តហោះ និងចំនុចទីតាំងនៃការទម្លាក់គ្រាប់បែកទាំងនោះផងដែរ។

ឯកឧត្តម ហេង រតនា ក៏បានបញ្ជាក់ផងដែរថា ការពន្យល់ខាងលើ គ្រាន់តែចំនុចសង្ខេបខ្លីមកបញ្ជាក់តែប៉ុណ្ណោះ ដោយឡែកបើផ្អែកតាមលក្ខណៈបច្ចេកទេស គឺមានចំនុចវិភាគសំណាកជាច្រើន។ ឯកឧត្តម បន្តទៀតថា ប្រការដូចខាងលើនេះជាលក្ខណៈបច្ចេកទេស គ្មានការយល់ច្រឡំគ្នារវាងគ្រាប់បែកទម្លាក់ពីយន្តហោះក្នុងសង្គ្រាមថ្មីៗនេះ ជាមួយគ្រាប់បែកទម្លាក់ពីយន្តហោះក្នុងសម័យសង្គ្រាមអតីតកាលឡើយ។ នេះបើយោងតាមហ្វេសបុក ផ្ទាល់ខ្លួនរបស់ ឯកឧត្តម ហេង រតនា អគ្គនាយកស៊ីម៉ាក-CMAC៕