ភ្នំពេញ៖ សហគមន៍កសិកម្មទំនើប នៅក្នុងស្រុកបារាយណ៍ ខេត្តកំពង់ធំ កំពុងទទួលបានអត្ថប្រយោជន៍ជាច្រើន ដូចជាគេចផុតពីបញ្ហាធ្លាក់ថ្លៃស្រូវដោយសារមានកិច្ចសន្យាថ្លៃទុកជាមុន, កាត់បន្ថយថ្លៃដើមលើជីថ្នាំ និងទទួលបានដើមទុនយកទៅប្រើប្រាស់ក្នុងអត្រាការប្រាក់ទាបពេញមួយរដូវ។ នេះបើតាមការលើកឡើងរបស់ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ។

ឯកឧត្តម ឃឹម ហ្វីណង់ បានឱ្យដឹងនាថ្ងៃទី១៧ ខែកញ្ញា ឆ្នាំ២០២៥ ថា បើមិនមានអ្វីប្រែប្រួលទេ សហគមន៍នេះ អាចនឹងមានសមាជិកថ្មីៗកើនឡើងរហូតដល់ទៅទ្វេរដងនៅក្នុងរដូវកាលថ្មីខាងមុខនេះ ដែលបង្ហាញឱ្យឃើញភាពជោគជ័យ និងវឌ្ឍនភាពជាវិជ្ជមាននៃកម្មវិធីគោលនយោបាយអាទិភាពរបស់រាជរដ្ឋាភិបាល៕