ភ្នំពេញ៖ ឥណ្ឌា ចង់បង្កើនការនាំចូលគ្រាប់ស្វាយចន្ទីស្រស់ ទៅកាន់ទីផ្សារឥណ្ឌា និងពង្រីកការវិនិយោគលើដំណាំស្វាយចន្ទី តាមរយៈការកែច្នៃ និងការនាំចេញ ដោយបង្កើតរោងចក្រសម្រាប់កែច្នៃគ្រាប់ស្វាយចន្ទីនៅខេត្តកំពង់ធំ។ នេះបើតាមការលើកឡើងរបស់ លោកបណ្ឌិត Sudhanshu លេខាធិការនៃអាជ្ញាធរអភិវឌ្ឍន៍ការនាំចេញផលិតផលកសិកម្ម និងអាហារកែច្នៃ (APEDA)។

បើតាមការលើកឡើងរបស់ លោកបណ្ឌិត Sudhanshu ក្នុងកិច្ចពិភាក្សាជាមួយ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ គណៈប្រតិភូឥណ្ឌា ក៏មានបំណងពង្រីកការវិនិយោគលើវិស័យកសិកម្មដែលមានសក្តានុពល ដើម្បីបង្កើនកសិ-ពាណិជ្ជកម្មឱ្យកាន់តែកើនឡើងថែមទៀត រវាងប្រទេសទាំងពីរ។

ឯកឧត្តម តូច ប៊ុនហួរ បញ្ជាក់ជូនគណៈប្រតិភូធុរកិច្ចថា កម្ពុជា ស្វាគមន៍ដល់អ្នកវិនិយោគទាំងឡាយណា ដែលមានបំណងចង់បង្កើតរោងចក្រកែច្នៃគ្រាប់ស្វាយចន្ទី និងនាំចេញទៅកាន់ទីផ្សារអន្តរជាតិ។ កម្ពុជា ជាប្រទេសផលិតគ្រាប់ស្វាយច្រើន ដែលមានប្រភេទពូជល្អ គុណភាពខ្ពស់ និងរសជាតិឆ្ងាញ់ ដូចជាប្រភេទពូជ M23 M10 H09 និង IM4។ គួរបញ្ជាក់ថា គណៈប្រតិភូឥណ្ឌា នឹងបន្តជួបជាមួយវិស័យឯកជនកម្ពុជា ព្រមទាំងទស្សនកិច្ចទៅខេត្តកំពង់ធំ ដែលជាតំបន់សក្តានុពលស្វាយចន្ទីផងដែរ៕