ភ្នំពេញ៖ សន្លឹកកិច្ចការ «បេក្ខជនបាក់ឌុប» នៅមណ្ឌលប្រឡងតាមបណ្តាលខេត្ត និង មណ្ឌលប្រឡងទាំងអស់ក្នុងរាជធានីភ្នំពេញ នឹងដឹកមករក្សាទុកនៅវិទ្យាល័យព្រះស៊ីសុវត្ថិ រាជធានីភ្នំពេញ នាព្រឹកថ្ងៃទី៣០ សីហា នេះ ដោយការមានបិតសាឡេដើម្បីរក្សាទុកសន្លឹកកិច្ចការក្រោមការត្រួតពិនិត្យដោយមន្ត្រីអង្គភាពប្រឆាំងអំពើពុករលួយ។ នេះបើយោងតាមរដ្ឋមន្ត្រីក្រសួងអប់រំ ឯកឧត្តមបណ្ឌិតសភាចារ្យ ហង់ជួន ណារ៉ុន។

បន្ទាប់ពីបញ្ជប់ការប្រឡង នៅល្ងាចថ្ងៃទី២៩ សីហា ឯកឧត្តមបណ្ឌិតសភាចារ្យ ហង់ជួន ណារ៉ុន ដឹកនាំក្រុមការងារពាក់ព័ន្ធចុះពិនិត្យសកម្មភាព នៃការរៀបចំទទួលទុកដាក់ហឹបសុវត្ថិភាពសន្លឹកកិច្ចការរបស់បេក្ខជន មកពីមណ្ឌលប្រឡងទាំងអស់ក្នុងរាជធានីភ្នំពេញ និងខេត្តកណ្តាល យកមករក្សាទុកឱ្យមានសុវត្ថិភាពក្នុងបន្ទប់រក្សាទុកសន្លឹកកិច្ចការ ដោយមានការបិតសាឡេការពារនៅលើទ្វារបន្ទប់ក្រោមការត្រួតពិនិត្យដោយមន្ត្រីអង្គភាពប្រឆាំងអំពើពុករលួយ នៅវិទ្យាល័យព្រះស៊ីសុវត្ថិ។

ដោយឡែក ចំពោះសន្លឹកកិច្ចការនៅមណ្ឌលប្រឡងតាមបណ្តាលខេត្ត បន្ទាប់ពីដំណើរការ សំណេរត្រូវបានបញ្ជប់ បានដឹកជញ្ជូនយកទៅរក្សាទុកនៅតាមសាលាខេត្តនីមួយៗ ដើម្បីធានាឱ្យបាននូវសុវត្ថិភាព យុត្តិធម៌ និងតម្លាភាព ដោយការមានបិតសាឡេ រក្សាទុកសន្លឹកកិច្ចការក្រោមការត្រួតពិនិត្យដោយមន្ត្រីអង្គភាពប្រឆាំងអំពើពុករលួយ ហើយរង់ចាំដល់ព្រឹកថ្ងៃទី៣០ សីហា ដើម្បីដឹកមករក្សាទុកនៅវិទ្យាល័យព្រះស៊ីសុវត្ថិ រាជធានីភ្នំពេញ។

គួរបញ្ជាក់ដែរថា លទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ នេះនឹងត្រូវប្រកាសនៅតាមមណ្ឌលប្រឡងក្នុងរាជធានី-ខេត្តទាំង២៥ ទូទាំងប្រទេសនៅថ្ងៃទី២០ ខែកញ្ញា ឆ្នាំ២០២៥ ព្រមទាំងផ្សព្វផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡាផងដែរ៕