ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដឹកនាំកិច្ចប្រជុំពាក់ព័ន្ធនឹងគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (Phnom Penh Logistics Complex – PPLC) ជាមួយឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន និងថ្នាក់ដឹកនាំក្រុមហ៊ុន YCH Group។

កិច្ចប្រជុំ ដែលធ្វើឡើង កាលពីថ្ងៃទី១២ ខែសីហា ឆ្នាំ២០២៥ នេះ ត្រូវបានរៀបចំឡើងក្នុងគោលបំណងដើម្បីពិនិត្យពិភាក្សាលើបច្ចុប្បន្នភាព និងវឌ្ឍនភាពនៃគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PPLC) ជាមួយក្រុមហ៊ុន YCH Group ដែលជាភាគីអភិវឌ្ឍន៍គម្រោង មុននឹងបន្តនីតិវិធីជំហានបន្ទាប់នាពេលខាងមុខ។

គម្រោង PPLC គឺជាគំនិតផ្តួចផ្តើមរបស់ រាជរដ្ឋាភិបាលកម្ពុជា ដើម្បីពង្រឹងវិស័យដឹកជញ្ជូន និងភស្តុភារកម្មនៅក្នុងប្រទេស។ គម្រោងនេះ មានគោលបំណងកាត់បន្ថយថ្លៃដើមដឹកជញ្ជូន ធ្វើឱ្យប្រសើរឡើងនូវប្រសិទ្ធភាព និងបង្កើនសមត្ថភាពប្រកួតប្រជែងក្នុងវិស័យភស្តុភារកម្មរបស់កម្ពុជា ទៅក្នុងតំបន់៕