ភ្នំពេញ៖ នៅឆមាសទី២ ឆ្នាំ២០២៥ សេដ្ឋកិច្ចកម្ពុជាត្រូវបានព្យាករថានឹងអាចថមថយល្បឿនកំណើន ដោយសារការប្រឈមនឹងហានិភ័យពីខាងក្រៅកាន់តែខ្លាំង ជាពិសេសនិន្នាការគាំពារនិយម និង ភាពតានតឹងភូមិសាស្ត្រនយោបាយពិភពលោកនិងតំបន់ ដែលអាចប៉ះពាល់ដល់ការនាំចេញ វិនិយោគផ្ទាល់បរទេស និងទេសចរណ៍នៅកម្ពុជា។ នេះបើយោងតាមរបាយការណ៍ របស់ធនាគារជាតិនៃកម្ពុជា ប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២៥។

តាមរបាយការណ៍ដ៏ដែលនេះ ព្យាករថាអត្រាអតិផរណា នឹងថយចុះមកកម្រិតទាបវិញ។ ស្ថិតក្នុងបរិការណ៍នេះ នយោបាយរូបិយវត្ថុនឹងត្រូវបន្តអនុវត្ត ប្រកបដោយភាពបត់បែននិងប្រុងប្រយ័ត្ន ក្នុងគោលដៅរក្សាស្ថិរភាពថ្លៃ និងអត្រាប្តូរប្រាក់ ដែលនឹងគាំទ្រដល់ការរក្សាស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ។

ទន្ទឹមនេះ ធនាគារជាតិនៃកម្ពុជានឹងបន្ត ពង្រឹងភាពធន់របស់ប្រព័ន្ធធនាគារ ជាមួយនឹងកិច្ចសហការជាមួយភាគីពាក់ព័ន្ធ ដើម្បីបន្តរួមចំណែក គាំទ្រសកម្មភាពសេដ្ឋកិច្ច ក្នុងពេលដែលការធ្វើទំនើបកម្មប្រព័ន្ធទូទាត់នឹងចូលរួមលើកកម្ពស់ ការអភិវឌ្ឍសេដ្ឋកិច្ចឌីជីថល ស្របតាមយុទ្ធសាស្ត្របញ្ចកោណ-ដំណាក់កាលទី១។

ប្រព័ន្ធការពារ ប្រាក់បញ្ញើ ក៏កំពុងត្រូវបានអភិវឌ្ឍ ដើម្បីពង្រឹងបន្ថែមទៀតនូវទំនុកចិត្តសាធារណជនលើប្រព័ន្ធ ធនាគារ ស្របពេលដែលសេចក្តីព្រាងប្រព័ន្ធវដ្តករសាស្ត្រស្តីពីហិរញ្ញវត្ថុប្រកបដោយចីរភាព និងផែនទី មគ្គុទ្ទេសក៍សម្រាប់ហិរញ្ញវត្ថុបៃតងនៅកម្ពុជា កំពុងត្រូវបានរៀបចំ ស្របតាមគោលនយោបាយ របស់រាជរដ្ឋាភិបាល៕