ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជើញអ្នកវិនិយោគពីទីក្រុង Hefei នៃប្រទេសចិន ដែលជាទីក្រុងមានផលិតផលក្នុងស្រុកសរុបប្រមាណ ១៩៣ពាន់លានដុល្លារ ក្នុងឆ្នាំ២០២៤ ជាមួយនឹងភាពឈានមុខក្នុងការផលិតយានយន្តប្រើថាមពលថ្មី និងជាក្រុងដែលស្ថិតក្នុងចំណោមមជ្ឈមណ្ឌលនវានុវត្តន៍កំពូលទាំង ៧របស់ប្រទេសចិន ឱ្យមកវិនិយោគលើសួនវិទ្យាសាស្ត្ររបស់កម្ពុជា។

ក្នុងជំនួបពិភាក្សាអំពីឱកាសសហការលើផ្នែកវិទ្យាសាស្ត្រ និងបច្ចេកវិទ្យា ជាមួយក្រុមប្រឹក្សាក្រុង Hefei នៃសន្និសីទប្រឹក្សានយោបាយប្រជាជនចិន ដឹកនាំដោយលោក Han Bing​ កាលពីថ្ងៃទី៨ ខែសីហា ឆ្នាំ២០២៥ ឯកឧត្តម ហែម វណ្ណឌី​ ស្នើឱ្យទីក្រុង Hefei ផ្តល់ការគាំទ្រដល់អ្នកស្រាវជ្រាវ និងអ្នកវិទ្យាសាស្ត្រកម្ពុជា តាមរយៈការផ្តល់អាហារូបករណ៍នៅសាកលវិទ្យាល័យដែលផ្តោតលើជំនាញ STEM របស់ក្រុង Hefei និងគាំទ្រដល់មន្ទីរពិសោធន៍របស់ក្រសួង។​

ជាមួយគ្នានេះ ឯកឧត្តម ហែម វណ្ណឌី​​ ក៏បានគូសបញ្ជាក់អំពីឱកាសដែលភាគីទាំងពីរ អាចសហការក្រោម អនុស្សរណៈនៃការយោគយល់ដ៏ទូលំទូលាយ នាពេលថ្មីៗនេះ រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងវិទ្យាសាស្ត្រ និងបច្ចេកវិទ្យារបស់ប្រទេសចិន ដែលកំណត់ក្របខ័ណ្ឌសម្រាប់កិច្ចសហប្រតិបត្តិការរយៈពេលវែង។​ ក្នុងជំនួបខាងលើរដ្ឋមន្ត្រីឧស្សាហកម្ម​ ក៏បានលើកឡើងអំពីភាគលាភប្រជាសាស្ត្ររបស់កម្ពុជា និងភាពចាំបាច់ក្នុងការចាប់យកបច្ចេកវិទ្យា ដើម្បីពន្លឿនបរិវត្តកម្មឆ្ពោះទៅរកសេដ្ឋកិច្ចឌីជីថលផងដែរ៕