ភ្នំពេញ៖ សហគមន៍កសិកម្មទំនើបដំណាំស្រូវ «ព្រះនេត្យព្រះមានជ័យ» នៅខេត្តបន្ទាយមានជ័យ គ្រោងផលិតពូជស្រូវសែនក្រអូប និងស្រូវស្រង៉ែស្រាល លើផ្ទៃដីប្រមាណ ៣ពាន់ហិកតា និងក្នុងតម្លៃពិសេសលើសពីថ្លៃទីផ្សារ ព្រមទាំងមានចុះកិច្ចសន្យាទុកជាមុន។ នេះបើតាមការលើកឡើងរបស់ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្មរុក្ខាប្រមាញ់ និងនេសាទ។

ឯកឧត្តម ឃឹម ហ្វីណង់ បញ្ជាក់ថា សហគមន៍កសិកម្មទំនើបដំណាំស្រូវ «ព្រះនេត្យព្រះមានជ័យ» នេះផងដែរ បានកើនឡើងសមាជិកដល់ជិត ៣០០គ្រួសារ បន្ទាប់ពីបានជួបសំណេះសំណាលដោយផ្ទាល់ជាមួយឯកឧត្តមរដ្ឋមន្ត្រីក្រសួងកសិកម្ម ឌិត ទីណា។ ឯកឧត្តមអ្នកនាំពាក្យកសិកម្ម លើកឡើងដូច្នេះថា៖ «ខ្ញុំ ពិតជាសប្បាយចិត្ត ដែលឃើញកសិករកាន់តែច្រើន ចាប់ផ្តើមមើលឃើញពីអត្ថប្រយោជន៍នៃសហគមន៍កសិកម្មទំនើប និងស្ម័គ្រចិត្តចូលរួមកាន់តែបានទូលំទូលាយ»។

ការចងក្រងជាសហគមន៍កសិកម្មទំនើប នឹងធ្វើឱ្យប្រជាកសិករអាចការពារខ្លួនពីបញ្ហាឡើងចុះ នៃថ្លៃទីផ្សារ កាត់បន្ថយថ្លៃដើមផលិត និងទទួលបានដើមទុនសម្រាប់ការបង្កបង្កើនផលពេញមួយរដូវ។ ចំពោះក្រុមការងារ នៃក្រសួងកសិកម្ម គឺត្រៀមខ្លួនរួចជាស្រេចដើម្បីចងក្រង និងបង្កើតជាសហគមន៍កសិកម្មទំនើបជូនដល់បងប្អូនកសិករ៕