ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ណែនាំឱ្យប្រជាពលរដ្ឋ ដែលស្វែងរកការងារធ្វើ ឬចង់រៀនជំនាញវិជ្ជាជីវៈ និងបច្ចេកទេស ពិសេសពលរដ្ឋ ដែលទើបវិលត្រឡប់ពីថៃ ទាក់ទងមកលេខទូរសព្ទ ១២៩៧ ដើម្បីទទួលបានការងារធ្វើភ្លាមៗ។

ឯកឧត្តម ហេង សួរ បញ្ជាក់ថា ក្រសួងការងារ នឹងជួយឱ្យប្រជាពលរដ្ឋ ទទួលបានឱកាសរៀនជំនាញវិជ្ជាជីវៈ និងបច្ចេកទេស ដើម្បីមានលំនឹងជីវភាព និងបំពេញក្ដីស្រមៃ ដែលចង់មានជំនាញពិតប្រាកដប្រចាំជីវិត។ ចំពោះប្រជាពលរដ្ឋ ដែលមានចំណាប់អារម្មណ៍ អាចទាក់ទងមកកាន់មន្ត្រីក្រសួងការងារ ដើម្បីសាកសួរព័ត៌មានស្ដីពី ការងារ ការរៀនជំនាញវិជ្ជាជីវៈ និងបច្ចេកទេស ក៏ដូចជាអត្ថប្រយោជន៍ ប.ស.ស. និងអត្ថប្រយោជន៍ផ្សេងៗទៀត៕