ភ្នំពេញ៖ ឯកឧត្ដម​បណ្ឌិត​ លី​ ធុជ​​ អនុប្រធានទី១ អាជ្ញាធរមីន បាន​ស្នើ​​ឱ្យ​អង្គការ​ជំនួយរបស់ប្រជាពលរដ្ឋន័រវែស (NPA) ប្រចាំ​កម្ពុជា​ គាំទ្រកម្ពុជា​​ធ្វើ​យុទ្ធនាការជាសកល ប្រយុទ្ធ​ប្រឆាំង​នឹង​ការ​ប្រើប្រាស់ ​គ្រាប់បែក​ចង្កោម​ របស់​យោធា​ថៃ​ មក​លើ​ប្រទេស​កម្ពុជា​។ ​

ក្នុងជំនួបពិភាក្សាជាមួយលោក Hans Risser​ នាយក​​អង្គការ​ជំនួយរបស់ប្រជាពលរដ្ឋន័រវែស (NPA) ប្រចាំ​កម្ពុជា ឯក​ឧត្តម​ លី​ ធុជ​ លើកឡើងអំពីជម្លោះប្រដាប់អាវុធរយៈពេល ៥ថ្ងៃ រវាងកម្ពុជា-ថៃ ដោយឯកឧត្តម គូសបញ្ជាក់ថា យោធាថៃបានប្រើប្រាស់សព្វាវុធធុនធ្ងន់គ្រប់ប្រភេទដែលពិភពលោក​ហាមប្រាម ក្នុងនោះរួមទាំង​ការ​ប្រើប្រាស់​គ្រាប់បែកចង្កោម ដើម្បីធ្វើការឈ្លានពាន​មកលើទឹកដីប្រទេសកម្ពុជា។​

ឯកឧត្តម លី​ ធុជ​​ បានបន្តទៀតថា ការប្រើប្រាស់គ្រាប់បែកចង្កោមរបស់យោធាថៃ បានបង្កនូវផលប៉ះពាល់យ៉ាងធ្ងន់ធ្ងរ និងបង្កគ្រោះថ្នាក់យូរអង្វែងដល់ប្រជាជនកម្ពុជាស្លូតត្រង់ ពិសេសក្មេងតូចៗ ក៏ដូចបង្កភាពភ័យខ្លាចដល់សហគមន៍ជាច្រើនជំនាន់ទៅមុខទៀត។ នេះបើយោងតាមការចុះផ្សាយរបស់ អាជ្ញាធរ​មីនកម្ពុជា នាថ្ងៃទី០៦ ខែសីហា ឆ្នាំ២០២៥៕