ភ្នំពេញ៖ សហព័ន្ធឧស្សាហកម្មនិងពាណិជ្ជកម្ម (SANKON) នឹងសហការជាមួយកម្ពុជា រៀបចំនូវវេទិកាធុរកិច្ច និងការផ្គូរផ្គងពាណិជ្ជកម្ម រួមទាំងដំណើរទស្សនកិច្ចរបស់ពាណិជ្ជករ និងអ្នកវិនិយោគតួកគីយ៉េមកកាន់ប្រទេសកម្ពុជា ដើម្បីស្វែងរកឱកាសវិនិយោគ និងធុរកិច្ច ក្នុងពេលខាងមុខ។ នេះបើតាមការចុះផ្សាយរបស់ ក្រសួងពាណិជ្ជកម្ម កាលពីថ្ងៃទី២៣ ខែកក្កដា ឆ្នាំ២០២៥។

ក្នុងកិច្ចពិភាក្សាជាមួយ លោក Ferudun Cevahiroğlu ប្រធានសហព័ន្ធឧស្សាហកម្មនិងពាណិជ្ជកម្ម (SANKON) លោក កែវ ប៊ុនថេង អនុព័ន្ធពាណិជ្ជកម្មអមស្ថានឯកអគ្គរាជទូតកម្ពុជា ប្រចាំតួកគីយ៉េ បានប្រាប់វិនិយោគិន និងពាណិជ្ជករតួកគីយ៉េ អំពីស្ថេរភាពនយោបាយ ស្ថានភាពម៉ាក្រូសេដ្ឋកិច្ច អត្ថប្រយោជន៍ និងសក្តានុពលក្នុងការធ្វើពាណិជ្ជកម្ម និងវិនិយោគនៅកម្ពុជា ការលើកទឹកចិត្ត និងការការពារវិនិយោគិន ក៏ដូចជាការវិវត្តន៍ថ្មីៗ នៃច្បាប់និងគោលនយោបាយសំខាន់ៗរបស់រាជរដ្ឋាភិបាល ពាក់ព័ន្ធនឹងពាណិជ្ជកម្ម និងការវិនិយោគផងដែរ។

ជំនួប ដែលធ្វើឡើង កាលពីទី២១ ខែកក្កដា ឆ្នាំ២០២៥ មានគោលបំណងពិភាក្សាអំពីកិច្ចប្រតិបត្តិការក្នុងការជំរុញពាណិជ្ជកម្ម និងការវិនិយោគរវាង ប្រទេសកម្ពុជា និងតួកគីយ៉េ៕