ភ្នំពេញ៖ បរិវត្តកម្មឌីជីថលសហគ្រាស លើកយកប្រធានបទ ការផ្សព្វផ្សាយតាមបណ្តាញសង្គម រួមមាន៖ចំណុចសំខាន់នៃការធ្វើទីផ្សារ, មូលដ្ឋានគ្រឹះនៃម៉ាកសញ្ញា និងការរចនា, ការអនុវត្តជាក្រុមនៃរចនាក្រាហ្វិក, ការរៀបចំផែនការមាតិកា និងការប្រើប្រាស់ជំនួយបច្ចេកវិទ្យា AI ក្នុងការជួយរៀបចំផែនការទីផ្សារ និងមាតិកា និងការប្រើប្រាស់ថ្នាលគ្រប់គ្រងផេកអាជីវកម្ម Meta ដោយប្រសិទ្ធភាព និងសុវត្ថិភាពបណ្តុះបណ្តាល ដល់ម្ចាស់អាជីវកម្មធុនតូច និងមធ្យម (SMEs) ក្នុងខេត្តបាត់ដំបង ឥតគិតថ្លៃ។

តាមរយៈវគ្គបណ្តុះបណ្តាល ដែលរៀបចំដោយ ក្រសួងសេដ្ឋកិច្ច និងហិរញ្ញវត្ថុ រួមជាមួយមជ្ឈមណ្ឌលបណ្តុះបណ្តាលធុរៈកិច្ចថ្មី «តេជោ» ដែលគាំទ្រថវិកាដោយ មូលនិធិអភិវឌ្ឍជំនាញ (SDF) អនុវត្តគម្រោងដោយក្រុមហ៊ុន Mangrove Studio Co., Ltd មានគោលបំណងជំរុញឱ្យម្ចាស់ SMEs ចាប់យកឌីជីថលសម្រាប់អាជីវកម្ម បង្កើនសមត្ថភាពប្រកួតប្រជែង លើការពង្រីកទីផ្សារ និងប្រសិទ្ធភាពសេដ្ឋកិច្ច តាមរយៈការផ្សព្វផ្សាយតាមបណ្តាញសង្គម ទាក់ទងនឹងការរចនាបង្កើតមាតិកាដោយប្រើ AI។

គួរបញ្ជាក់ថា ក្នុងវគ្គបណ្តុះបណ្តាល កាលពីថ្ងៃទី១៨-១៩ ខែកក្កដា ឆ្នាំ២០២៥ មានការចូលរួមពីម្ចាស់អាជីវកម្មធុនតូច និងមធ្យមចំនួន ៣០ក្រុមហ៊ុន ដែលបានចុះនៅក្នុងបញ្ជីពាណិជ្ជកម្ម ក្នុងខេត្តបាត់ដំបង។ សិក្ខាកាមទាំងអស់ក្នុងវគ្គបណ្តុះបណ្តាល ទទួលបានសម្ភារបណ្តុះបណ្តាល ដែលជាខ្លឹមសារនៃវគ្គសិក្សាយ៉ាងពេញលេញ និងមានចំណេះដឹងទៅអនុវត្តនៅក្នុងអាជីវកម្មរបស់ខ្លួន។ បន្ថែមលើនេះ សិក្ខាកាមទាំងអស់ ទទួលបានអាហារថ្ងៃត្រង់ អាហារសម្រន់ និងភេសជ្ជៈផងដែរ៕