ភ្នំពេញ៖ សម្តេចធិបតី ហ៊ុន ម៉ាណែត បញ្ជាក់ថា មានក្រុមជ្រុលនិយម បានបន្តក្លែងបន្លំជាសម្តេចធិបតី និងបង្កើតព័ត៌មានក្លែងក្លាយនាំឱ្យមានការយល់ច្រឡំពាក់ព័ន្ធនឹងករណីព្រំដែន។

ទាក់ទងនឹងករណីខាងលើនេះ សម្តេចធិបតី ហ៊ុន ម៉ាណែត លើកឡើងថា ចំពោះគោលការណ៍បើកព្រំដែនឡើងវិញ គឺនៅរក្សាដដែល ដែលត្រូវអនុវត្តបើសិន៖ ១. ថៃប្រកាសបើកមុនជាឯកតោភាគី ហើយធានាថា នឹងមិនមានការបិទជាឯកតោភាគីនេះទៀតទេ, ២. ការបើកច្រកព្រំដែន គឺត្រូវបើកព្រមគ្នា ហើយគ្រប់ច្រកទាំងអស់ និង៣. ត្រូវបើកឱ្យដូចមុនថ្ងៃ៧ មិថុនា ពោលគឺបើកចាប់ពីម៉ោង ៦ព្រឹកដល់ម៉ោង ១០យប់ និងបើកសម្រាប់មនុស្ស និងទំនិញទាំងអស់ដូចដើម។

បើថៃ ធ្វើតាម ៣លក្ខខណ្ឌខាងលើ នោះកម្ពុជា នឹងបើកដំណើរឡើងវិញដូចគ្នា យ៉ាងយូរត្រឹម ៥ម៉ោងក្រោយពីការបើករបស់ភាគីថៃ។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត កាលពីថ្ងៃទី១៩ ខែកក្កដា ឆ្នាំ២០២៥៕