ភ្នំពេញ៖ លោក សំកុល សុចិត្រា អភិបាលរងខេត្តសៀមរាប លើកទឹកចិត្តឱ្យគណៈបញ្ជាការ ឯកភាពរដ្ឋបាលក្រុង ស្រុក និងអាជ្ញាធរមានសមត្ថកិច្ច ចុះតាមដានត្រួតពិនិត្យជាប្រចាំ ក្នុងការទប់ស្កាត់ និងបង្ក្រាបល្បែងស៊ីសងគ្រប់ប្រភេទនៅក្នុងភូមិសាស្ត្ររបស់ខ្លួន។ នេះបើតាមការចុះផ្សាយរបស់ រដ្ឋបាលខេត្តសៀមរាប កាលពីថ្ងៃទី១៧ ខែកក្កដា ឆ្នាំ២០២៥។

ក្នុងកិច្ចប្រជុំពិភាក្សា ស្តីពីការគ្រប់គ្រងប្រតិបត្តិការល្បែងពាណិជ្ជកម្ម និងការគ្រប់គ្រងផលប៉ះពាល់ពីល្បែងស៊ីសងគ្រប់ប្រភេទ ជូនអាជ្ញាធរសាធារណៈពាក់ព័ន្ធ នៅខេត្តសៀមរាប លោកអភិបាលរងខេត្តសៀមរាប ក៏បានលើកទឹកចិត្ដឱ្យរដ្ឋបាលក្រុង ស្រុក បំពេញកាតព្វកិច្ចទាំងឡាយ ដែលច្បាប់ និងលិខិត បទដ្ឋានគតិយុត្ដនានា បានកំណត់ជាធរមាន ពាក់ព័ន្ធការអនុវត្តគោលនយោបាយភូមិ ឃុំ សង្កាត់ មានសុវត្ថិភាព។

«រដ្ឋបាលក្រុង ស្រុក ក៏ត្រូវអនុវត្តតាមអនុសាសន៍ណែនាំរបស់ សម្ដេចធិបតីនាយករដ្ឋមន្ត្រី កាលពីថ្ងៃទី១៤ ខែកុម្ភៈ ឆ្នាំ២០២៤ ដែលបានណែនាំដល់គណៈបញ្ជាការឯកភាពរដ្ឋបាល រាជធានី ខេត្ត ចុះត្រួតពិនិត្យ ទប់ស្កាត់ និងបញ្ឈប់ជាបន្ទាន់នូវការធ្វើប្រតិបត្តិការអាជីវកម្មឆ្នោត-ឡូតូ និងឆ្នោតផ្សងសំណាងទាំង អ ស់នៅក្នុងភូមិសាស្ត្រមូលដ្ឋានរបស់ខ្លួន ឱ្យកាន់តែមានប្រសិទ្ធភាព»។ នេះបើតាមប្រសាសន៍របស់ លោក សំកុល សុចិត្រា។

គួរបញ្ជាក់ថា ក្នុងកិច្ចប្រជុំនោះ ក្រុមការងារគណៈកម្មការគ្រប់គ្រងល្បែងពាណិជ្ជកម្មកម្ពុជា បានធ្វើបទបង្ហាញស្តីពីការគ្រប់គ្រងប្រតិបត្តិការល្បែងពាណិជ្ជកម្ម និងការគ្រប់គ្រងផលប៉ះពាល់ពីល្បែងស៊ីសងគ្រប់ប្រភេទជូន សមាជិក សមាជិការ នៃអង្គប្រជុំផងដែរ៕