ភ្នំពេញ៖ ក្រសួងពាណិជ្ជកម្ម និងអង្គភាពកម្មសិទ្ធិបញ្ញានៃប្រទេសកាណាដា នឹងពង្រីកកិច្ចសហប្រតិបត្តិការលើវិស័យកម្មសិទ្ធិបញ្ញា ដើម្បីលើកកម្ពស់សហគ្រាសធុនតូច និងមធ្យម(SMEs) ជំរុញការស្រាវជ្រាវ និងនវានុវត្តន៍រវាងប្រទេសកម្ពុជា និងកាណាដា ពិសេសពង្រឹងកិច្ចសហប្រតិបត្តិការកម្មសិទ្ធិបញ្ញាក្នុងក្រមខណ្ឌអាស៊ាន ខណៈពេលដែលកម្ពុជាធ្វើជាប្រធានក្រុមការងារអាស៊ានស្តីពីកិច្ចសហប្រតិបត្តិការកម្មសិទ្ធិបញ្ញា។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១៧ ខែកក្កដា ឆ្នាំ២០២៥។

ក្នុងជំនួបជាមួយលោក Konstantinos Georgaras ប្រធានអង្គភាពកម្មសិទ្ធិបញ្ញានៃប្រទេសកាណាដា ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម បានលើកឡើងពីផលិតផលម៉ាកសម្គាល់ភូមិសាស្ត្រទំនិញរបស់កម្ពុជា ក្នុងនោះ ម្រេចកំពត និងអំបិលកំពត-កែប បានទទួលសិទ្ធិការពារអន្តរជាតិក្នុងតាមអនុសញ្ញាទីក្រុងហ្សឺណែវ នៃកិច្ចព្រមព្រៀង Lisbon Agreement។ ជាមួយគ្នានេះ ភាគីកាណាដា បានបង្ហាញពីប្រព័ន្ធចុះបញ្ជីការពារផលិតផលសម្គាល់ភូមិសាស្ត្ររបស់ខ្លួន និងលើកទឹកចិត្តឱ្យកម្ពុជាចុះបញ្ជីការពារផលិតផលសម្គាល់ភូមិសាស្ត្រនៅប្រទេសកាណាដា។

លើសពីនេះ ឯកឧត្តម អ៊ុក ប្រជា បានអរគុណដល់អង្គភាពកម្មសិទ្ធិបញ្ញានៃប្រទេសកាណាដា ដែលបានរៀបចំកម្មវិធី CIPO-WIPO Executive Program និងអញ្ជើញតំណាងពីកម្ពុជាឱ្យចូលរួមដើម្បីដកស្រង់ផ្លាស់ប្តូរបទពិសោធជាមួយប្រធានអង្គភាពកម្មសិទ្ធិបញ្ញាពីបណ្តាប្រទេសដទៃ៕