ភ្នំពេញ៖ ក្រសួងបរិស្ថាន នឹងសហការជាមួយអាជ្ញាធរខេត្តបាត់ដំបង មន្ទីបរិស្ថានខេត្ត អង្គការសត្វព្រៃនិងរុក្ខជាតិអន្តរជាតិនៅកម្ពុជា(FFI) និងដៃគូរអភិវឌ្ឍន៍ ដើម្បីសិក្សាពិនិត្យ និងរៀបចំចុះបញ្ជីភ្នំសំពៅ និងភ្នំបានណន់ ខេត្តបាត់ដំបងជាតំបន់បេតិភណ្ឌធម្មជាតិ។ នេះបើតាមការចុះផ្សាយរបស់ក្រសួងបរិស្ថាន កាលពីថ្ងៃទី១១ ខែកក្កដា ឆ្នាំ២០២៥។

ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានលើកឡើងថា តាមរយៈការសិក្សាពិនិត្យ និងស្រាវជ្រាវពីសំណាក់មន្រ្តីជំនាញ និងភាគីពាក់ព័ន្ធតំបន់ កំពុងប្រែក្លាយទៅជាតំបន់ដែលមានសក្តានុពលយ៉ាងសំខាន់ ប្រវត្តិសាស្រ្ត និងមានសម្បត្តិធនធានធម្មជាតិដែលអាចរៀបចំជាគោលដៅលំហែបៃតងបានផងដែរ។

ទន្ទឹមនេះ លោក ហេង ហុង ប្រធាននាយកដ្ឋានតំបន់បេតិភណ្ឌធម្មជាតិ អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន ជាប្រធានក្រុមការងារ ក្រសួងបរិស្ថាន បានសហការជាមួយអ្នកស្រាវជ្រាវ មកពី អង្គការសត្វព្រៃ និងរុក្ខជាតិអន្តរជាតិនៅកម្ពុជា(FFI) ដោយមានការចូលរួមពីមន្ទីបរិស្ថានខេត្តបាត់ដំបង់ កាលពីថ្ងៃទី៧-៨ ខែកក្កដា ឆ្នាំ២០២៥ បានផ្សព្វផ្សាយពីលទ្ធផល ស្តីពី«ការស្រាវជ្រាវជីវៈចម្រុះនៅភ្នំសំពៅ និងភ្នំបានណន់» ដោយអង្គការ(FFI) និងនាយកដ្ឋានជីវៈចម្រុះ កាលពីឆ្នាំ២០២៤។

ចំពោះ លទ្ធផលនៃការស្រាវជ្រាវដោយប្រើម៉ាស៊ីនថតស្វ័យប្រវត្តិ(Camera trap) បានរកឃើញប្រភេទសត្វស្ថិតនៅក្នុងចំណាត់ថ្នាក់កំពុងរងគ្រោះជាសាកល រួមមាន៖ សត្វពង្រួល, ក្ងោក, កែះ, ស្វាត្រោស, ស្វាក្តាម និងប្រភេទសត្វមានដោយបង្គួរផ្សេងទៀតដូចជា សត្វឆ្កែចចក, ឆ្មាដាវ, ប្រម៉ា, ក្តានញ៉ែតូច ក្នុងនោះក៏បានរកឃើញសត្វប្រភេទ សត្វតុកកែ, សត្វចីងចក់, និងខ្យងគោកដែលជាប្រភេទថ្មីសម្រាប់កម្ពុជានិងពិភពលោក៕