ភ្នំពេញ៖ សហគ្រាស ជាអ្នកជាប់ពន្ធមធ្យម និងអ្នកជាប់ពន្ធធំ តាមរបបស្វ័យប្រកាស ត្រូវកាន់ និងកត់ត្រាបញ្ជីគណនេយ្យតាមស្តង់ដារបាយការណ៍ហិរញ្ញវត្ថុ អន្តរជាតិនៃកម្ពុជា។ ការកាន់ និងកត់ត្រាបញ្ជីគណនេយ្យត្រូវគោរពតាមគោលការណ៍សំខាន់ៗ ដូចជា៖

ទី១. ត្រូវប្រើប្រាស់ប្រព័ន្ធគណនេយ្យទ្វេភាគ ដោយផ្អែកលើមូលដ្ឋានគណនេយ្យបង្គរ, ទី២. រាល់ប្រតិបត្តិការត្រូវកត់ត្រាជាប្រាក់រៀល ឬរូបិយប័ណ្ណបរទេសណាមួយដែលមានការអនុញ្ញាតពីស្ថាប័នមានសមត្ថកិច្ច, ទី៣. ត្រូវចេញវិក្កយបត្រលើរាល់ប្រតិបត្តិការជាមួយបុគ្គលដទៃទៀត ហើយវិក្កយបត្រត្រូវមានលេខរៀង និងនិទ្ទេសត្រឹមត្រូវតាមការកំណត់ ត្រូវកត់ត្រាសេចក្តីរាយលម្អិតនៃវិក្កយបត្រឱ្យបានត្រឹមត្រូវចូលក្នុងទិនានុប្បវត្តិ។

ទី៤. លិខិតយុត្តិការត្រូវមានចុះថ្ងៃខែឆ្នាំ និងរៀបចំទុកដាក់តាមលំដាប់ច្បាស់លាស់, ទី៥. ត្រូវកត់ត្រាចូលបញ្ជីគណនេយ្យនូវរាល់ប្រតិបត្តិការតាមលំដាប់ដែលប្រតិបត្តិការទាំងនោះបានកើតឡើង, ទី៦. កំណត់ត្រាគណនេយ្យនីមួយៗត្រូវបង្ហាញអំពីប្រភព ខ្លឹមសារ ខ្ទង់គណនី លក្ខណសង្ខេបនៃប្រតិបត្តិការនិងឯកសារយោងជាសំអាង, ទី៧. រាល់ការកែតម្រូវត្រូវរក្សាទុកពីភស្តុតាងបញ្ជាក់ពីការកែតម្រូវនោះ ដើម្បីអាចរកឃើញឡើងវិញបាននូវទឹកប្រាក់ពិតប្រាកដនៃចលនាសាច់ប្រាក់នៅក្នុងគណនី និងទី៨. បញ្ជីគណនេយ្យត្រូវធ្វើជាភាសាខ្មែរ ដោយប្រើលេខខ្មែរ ឬលេខឡាតាំង ប៉ុន្តែអាចកាន់បញ្ជីគណនេយ្យជំនួយជាភាសាផ្សេងបាន។