ភ្នំពេញ៖ លោកបណ្ឌិត Dato' Sri Dr. Ricky Yaw ប្រធានសមាគមធុរកិច្ចម៉ាឡេស៊ី-កម្ពុជា (MCBA) លើកឡើងថា គណៈប្រតិភូធុរកិច្ចមកពី ២០សមាគម ចាប់អារម្មណ៍ស្វែងរកឱកាសវិនិយោគនៅកម្ពុជា លើវិស័យអប់រំ សុខាភិបាល សហគ្រាសធុនតូច និងមធ្យម (SMEs) ការកែច្នៃផលិតផលកសិកម្ម សំណង់ និងអចលនទ្រព្យជាដើម។

ក្នុងជំនួបពិភាក្សាការងារជាមួយ សម្តេចធិបតី ហ៊ុន ម៉ាណែត កាលពីថ្ងៃទី២៦ ខែមិថុនា ឆ្នាំ២០២៥ លោកបណ្ឌិត Dato' Sri Dr. Ricky Yaw ក៏បានលើកឡើងថា សមាគមធុរកិច្ចម៉ាឡេស៊ី-កម្ពុជា ត្រូវបានបង្កើតឡើងជាវេទិកាផ្សារភ្ជាប់ទំនាក់ទំនង និងការពង្រឹងភាពជាដៃគូរវាងធុរជន-វិនិយោគិន នៃប្រទេសទាំងពីរ។ ពាក់ព័ន្ធនឹងគោលបំណងវិនិយោគនេះផងដែរ សម្តេចធិបតី ហ៊ុន ម៉ាណែត ជំរុញឱ្យសមាគមធុរកិច្ចម៉ាឡេស៊ី-កម្ពុជា សហការជាមួយក្រសួង-ស្ថាប័នពាក់ព័ន្ធរបស់កម្ពុជា ដើម្បីស្វែងយល់ពីគោលនយោបាលលើកទឹកចិត្តនានា និងចាប់យកឱកាសវិនិយោគនៅកម្ពុជា។

សម្តេចធិបតី ហ៊ុន ម៉ាណែត ក៏បានលើកឡើងពីគោលនយោបាយ និងការដាក់ចេញនូវវិធានការចាំបាច់នានា របស់រាជរដ្ឋាភិបាលកម្ពុជា ដើម្បីគាំទ្រ និងលើកទឹកចិត្តដល់វិនិយោគិន ដែលរួមមាន ច្បាប់ស្តីពីវិនិយោគ ដែលប្រកបដោយភាពសេរី ជាមួយនឹងការលើកទឹកចិត្តជាច្រើន ជាពិសេសលើវិស័យ SMEs ដែលជាវិស័យគន្លឹះមួយក្នុងការរួមចំណែកដល់ការជំរុញកំណើនសេដ្ឋកិច្ចកម្ពុជា។ បើតាមការលើកឡើងរបស់ សម្តេច ហ៊ុន ម៉ាណែត រាជរដ្ឋាភិបាលកម្ពុជា ក៏បានដាក់ចេញនូវវិធានការនានា ដើម្បីធានានូវភាពប្រកួតប្រជែងរបស់កម្ពុជា ក្នុងតំបន់ និងអន្តរជាតិ និងបានស្វាគមន៍ដល់វិនិយោគិនម៉ាឡេស៊ី ដែលមានចំណាប់អារម្មណ៍ក្នុងការស្វែរកឱកាសវិនិយោគនៅកម្ពុជាផងដែរ។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត នាថ្ងៃទី២៦ ខែមិថុនា ឆ្នាំ២០២៥៕