ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា និង ឯកឧត្តម Faiyaz Murshid Kazi ឯកអគ្គរដ្ឋទូត នៃសាធារណរដ្ឋប្រជាមានិតបង់ក្លាដេស ព្រមព្រៀងជំរុញពាណិជ្ជកម្ម វិនិយោគរវាងកម្ពុជា និងបង់ក្លាដែសឱ្យកាន់តែមានការកើនឡើង និងមានភាពសកម្មជាងមុន។

សម្ដេចតេជោ លើកឡើងថា ស្នូលនៃទំនាក់ទំនងរវាងកម្ពុជា និងបង់ក្លាដែស គឺមិនអាចកាត់ផ្ដាច់បានពីសេដ្ឋកិច្ច និងពាណិជ្ជកម្ម ព្រមទាំងការវិនិយោគបាននោះទេ។ ឯកឧត្តម Faiyaz Murshid Kazi បានបញ្ជាក់ថា បង់ក្លាដែស ចង់ចូលរួមចំណែកធ្វើជាដៃគូក្នុងកិច្ចសហប្រតិបត្តិការ ភាពជាដៃគូជាមួយអាស៊ាន តាម ដែលបង់ក្លាដែសអាចធ្វើទៅបាន ជាពិសេសនៅក្នុងស្ថានភាពថ្មីៗនេះ គឺបញ្ហាមីយ៉ាន់ម៉ា ក្នុងនាមបង់ក្លាដែសជាប្រទេសជិតខាងជាប់ភូមិផងជាមួយមីយ៉ាន់ម៉ា ជាផ្នែកមួយអាចសន្ទនាជាមួយអាស៊ានជួយដល់តំបន់អាស៊ានផងដែរ។

សម្ដេចតេជោ ហ៊ុន សែន គាំទ្រជំហររបស់បង់ក្លាដែស ចង់ធ្វើជាដៃគូរបស់អាស៊ាន ដើម្បីពង្រីកទំនាក់ទំនងជាមួយអាស៊ាន ទាំងនៅក្នុងក្របខណ្ឌសេដ្ឋកិច្ច ពាណិជ្ជកម្ម និងក្របខ័ណ្ឌដទៃទៀត ពិសេសបញ្ហាមីយ៉ាន់ម៉ា។ សម្ដេចតេជោ ក៏បានផ្ដល់ជាគំនិតថា បង់ក្លាដែស គួរតែគិតគូរចូលជាដៃគូ នៃ RCEP ពីព្រោះបច្ចុប្បន្ននេះ RCEP កំពុងតែបើកផ្លូវឱ្យសមាជិកចូលបន្ថែម ហើយបង់ក្លាដែសជាប្រទេសដែលមិនឆ្ងាយពីតំបន់អាស៊ីអាគ្នេយ៍របស់យើង ដូច្នេះជាឱកាសប្រសិនបើបង់ក្លាដែសអាចចូលជាសមាជិក RCEP បាន។

ក្នុងឱកាសនោះ សម្ដេចតេជោ ក៏បានស្នើឱ្យបង់ក្លាដែស គាំទ្រកម្ពុជា ទាក់ទងទៅនឹងស្ថានភាពព្រំដែនកម្ពុជា និងថៃ ដោយសម្ដេច បានពន្យល់អំពីហេតុការណ៍ដែលបានកើតឡើងថ្មីៗនេះ ហើយបានស្នើឱ្យរដ្ឋាភិបាលបង់ក្លាដែស គាំទ្រចំហរកម្ពុជាដែលលើកឡើង និងដោះស្រាយបញ្ហាដោយសន្តិវិធី ពិសេសការរុញបញ្ហានេះទៅយន្តការច្បាប់អន្តរជាតិ ពោលគឺទៅកាន់តុលាការយុត្តិធម៌អន្តរជាតិ (ICJ)៕