ភ្នំពេញ៖ មន្ទីរទេសចរណ៍ខេត្តបាត់ដំបង អំពាវនាវឱ្យសាធារណជនឈប់ជឿព័ត៌មានក្លែងក្លាយ ស្វែងយល់ការពិត ដើម្បីប្រយុទ្ធប្រឆាំងនឹងព័ត៌មានក្លែងក្លាយ ការក្លែងបន្លំ និងការបំប្លែងការពិត ជាពិសេសករណីពាក់ព័ន្ធនឹង «បញ្ហាព្រំដែនកម្ពុជា និងថៃ» ក្នុងខេត្តព្រះវិហារ ការផ្សព្វផ្សាយត្រូវតែផ្តោតលើការកសាងទំនុកចិត្ត និងការផ្តល់នូវព័ត៌មានពិតប្រាកដ។ នេះបើតាមការចុះផ្សាយរបស់មន្ទីរទេសចរណ៍ខេត្តបាត់ដំបង កាលពីថ្ងៃទី១៦ ខែមិថុនា ឆ្នាំ២០២៥។

មន្ទីរទេសចរណ៍ខេត្តបាត់ដំបង បានឱ្យដឹងថា ប្រភពព័ត៌មានសំខាន់ៗ ដែលផ្លូវការ ពិត ត្រឹមត្រូវ និងជឿទុកចិត្ត មានដូចជា៖ ទី១.ប្រភពពីរាជរដ្ឋាភិបាលកម្ពុជា និងប្រភពពីហ្វេសប៊ុកសម្តេចតេជោ ប្រធានព្រឹទ្ធសភា និងសម្តេចធិបតីនាយករដ្ឋមន្ត្រី, ទី២.ប្រភពក្រសួងការបរទេសនិងសហប្រតិបត្តិការអន្តរជាតិ, ទី៣.ប្រភពក្រសួងការពារជាតិនៃព្រះរាជាណាចក្រកម្ពុជា, ទី៤.ក្រសួងព័ត៌មាន និងទី៥.អង្គភាពសារព័ត៌មាន ដែលមានក្រមសីលធម៌ និងវិជ្ជាជីវៈត្រឹមត្រូវ។

ជាមួយគ្នានេះ សាធារណជន និងជាពិសេសអ្នកសារព័ត៌មាន ត្រូវប្រកាន់ខ្ជាប់នូវការផ្ទៀងផ្ទាត់ប្រភពព័ត៌មានជាមុន ដោយផ្នែកលើក្រមសីលធម៌វិជ្ជាជីវៈច្បាស់លាស់ «សុក្រឹត្យភាព សុច្ចរិតភាព និងទំនួលខុសត្រូវ» មុននឹងជឿចែករំលែក និងផ្សព្វផ្សាយបន្ត៕