ភ្នំពេញ៖ លក្ខណៈអំណោយផល នៃអាកាសធាតុ ខ្យល់បរិសុទ្ធ ទេសភាពធម្មជាតិដ៏ទាក់ទាញ វាលស្មៅបៃតង និងពណ៌មាសដងទន្លេស្រែពក ធនធានធម្មជាតិដ៏សម្បូរបែប ព្រៃឈើ ដែនជម្រកសត្វព្រៃទាំង៥ វប្បធម៌ជនជាតិដើមភាគតិច និងធនធានជាច្រើនទៀត បង្កើតបានជាសក្តានុពលដ៏ពិសេសសម្រាប់ការអភិវឌ្ឍវិស័យទេសចរណ៍ខេត្តមណ្ឌលគិរី។ ទាំងនេះហើយ រាជរដ្ឋាភិបាល បានកំណត់យកតំបន់ចំនួន៦ សម្រាប់ «អភិវឌ្ឍន៍បម្រើការអភិរក្ស» ទុកជាតំបន់ទេសចរណ៍ធម្មជាតិ រួមមាន៖

តំបន់របៀងអេកូទេសចរណ៍ និងទេសចរណ៍ធម្មជាតិ នៃដែនជម្រកសត្វព្រៃទាំង៥, តំបន់របៀងទេសចរណ៍វប្បធម៌ និងអេកូទេសចរណ៍ប៊ូស្រាដាក់ដាំ, ក្រុងសែនមនោរម្យ, តំបន់ស្រុកអូររាំងភ្ជាប់ជាមួយការអភិវឌ្ឍអាកាសយានដ្ឋានខេត្តមណ្ឌលគិរី, តំបន់ប្រជុំជន នៃស្រុកកោះញែក និងតំបន់ទេសចរណ៍សមាហរ័ណតាមច្រកព្រំដែន។ ដើម្បីសម្រេចមហិច្ឆតាខាងលើ រាជរដ្ឋាភិបាល ដាក់ចេញនូវផែនការមេអភិវឌ្ឍន៍ វិស័យទេសចរណ៍ខេត្តមណ្ឌលគិរី ដើម្បីជំរុញការអនុវត្តឱ្យមានប្រសិទ្ធភាព។

ទន្ទឹមនឹងនេះ រាជរដ្ឋាភិបាលកម្ពុជា ក៏បានជំរុញឱ្យក្រសួង ស្ថាប័នពាក់ព័ន្ធ យកផែនការទាំងនេះ ទៅរៀបចំផែនការគាំទ្រតាមវិស័យរៀងខ្លួន និងអនុវត្តឱ្យមានប្រសិទ្ធភាព ក្រោមស្មារតីទទួលខុសត្រូវខ្ពស់ អនុលោមតាមទស្សនាទាន «ការអភិវឌ្ឍបម្រើការអភិរក្ស ការអភិរក្សទ្រទ្រង់ដល់ការអភិវឌ្ឍ»៕

ប្រភពពី៖ ផែនការមេ អភិវឌ្ឍន៍វិស័យទេសចរណ៍ខេត្តមណ្ឌលគិរី ២០២១-២០៣៥