ភ្នំពេញ៖ ក្រសួងពាណិជ្ជកម្ម នឹងបង្កើតមជ្ឈមណ្ឌលពាណិជ្ជកម្មឯកជនកម្ពុជា នៅទីក្រុងឡុងដ៍ និងទីក្រុងប៊ើមិនហែម នៃចក្រភពអង់គ្លេស ដើម្បីដាក់តាំងបង្ហាញផ្សព្វផ្សាយផលិតផលខ្មែរ នឹងផ្តល់ភាពងាយស្រួលក្នុងការផ្តល់ព័ត៌មានអំពីវិស័យពាណិជ្ជកម្ម ការវិនិយោគ ទេសចរណ៍ និងវប្បធម៌របស់កម្ពុជា ជូនធុរជន និងវិនិយោគិនអង់គ្លេស។ នេះបើយោងតាមការចុះផ្សាយរបស់ក្រសួងពាណិជ្ជកម្ម នាថ្ងៃទី១៦ ខែមិថុនា ឆ្នាំ២០២៥។

ពាក់ពន្ធ័នឹងគម្រោងបង្កើតមជ្ឈមណ្ឌលពាណិជ្ជកម្មឯកជនកម្ពុជា ឯកឧត្តម ស៊ាង ថៃ រដ្ឋលេខាធិការក្រសួងពាណិជ្ជកម្ម បានដឹកនាំគណៈប្រតិភូក្រសួងពាណិជ្ជកម្ម ចុះត្រួតពិនិត្យទីតាំងជាក់ស្តែង។ ជាមួយគ្នានោះ ឯកឧត្តម ស៊ាង ថៃ ជួបពិភាក្សាជាមួយ លោកជំទាវ ទួត បញ្ញា ឯកអគ្គរាជទូត កម្ពុជាប្រចាំនៅចក្រភពអង់គ្លេស ដើម្បីពិភាក្សាអំពីគោលបំណងនៃដំណើរទស្សនកិច្ច។

ក្នុងជំនួបនោះ លោកជំទាវ ទួត បញ្ញា បានបង្ហាញការគាំទ្រចំពោះក្រសួងពាណិជ្ជកម្ម ក្នុងការបង្កើតមជ្ឈមណ្ឌលពាណិជ្ជកម្មឯកជនកម្ពុជានៅចក្រភពអង់គ្លេស ដែលគម្រោងនេះនឹងជួយជំរុញធុរជន វិនិយោគិនអង់គ្លេស ធ្វើធុរកិច្ច និងបណ្តាក់ទុននៅកម្ពុជា ដោយនឹងរួមចំណែកជំរុញកំណើនពាណិជ្ជកម្មរវាងកម្ពុជា និងអង់គ្លេសឱ្យមានការកើនឡើងជាបន្តបន្ទាប់នាខាងមុខ៕