ភ្នំពេញ៖ និយ័តករមូលបត្រកម្ពុជា ចុះអនុស្សរណៈនៃការយោគយល់គ្នា (MoU) ជាមួយរដ្ឋបាលស្រុកឈឹងម៉ៃ ខេត្តហៃណាន នៃប្រទេសចិន ដើម្បីជំរុញការវិនិយោគក្នុងវិស័យមូលបត្រមកកម្ពុជា។ ការចុះ MoU នេះ ចុះហត្ថលេខាដោយលោក Sheng Yongjun លេខាធិការបក្សស្រុកឈឹងម៉ៃ និងឯកឧត្តម ស៊ូ សុជាតិ អគ្គនាយកនៃនិយ័តករមូលបត្រកម្ពុជា ក្នុងដំណើរទស្សនទៅកាន់ប្រទេសចិន។

ក្នុងជំនួបជាមួយលោក Sheng Yongjun នៃដំណើរទស្សនកិច្ចពីថ្ងៃទី១១ ដល់ថ្ងៃទី១៣ ខែមិថុនា ឆ្នាំ២០២៥ ដើម្បីពង្រឹងកិច្ចសហប្រតិបត្តិការអភិវឌ្ឍន៍ទីផ្សារមូលបត្រនៅកម្ពុជារវាងកម្ពុជា-ចិន ឯកឧត្តម ស៊ូ សុជាតិ បានលើកឡើងថា គោលបំណងនៃដំណើរទស្សនកិច្ចរបស់រយៈពេល ៣ថ្ងៃ គឺជំរុញការវិនិយោគ ពីប្រទេសចិនកាន់កម្ពុជាឱ្យកាន់តែច្រើនបន្ថែមទៀតលើគ្រប់វិស័យ និងជាពិសេសវិស័យមូលបត្រ។ ជាមួយគ្នានេះ លោក Sheng Yongjun បានបង្ហាញការគាំទ្រលើកម្ពុជា ក្នុងការជំរុញកិច្ចសហការ លើការវិនិយោគនៅក្នុងវិស័យមូលបត្ររវាងប្រទេសទាំងពីរ។

អំឡុងនៃដំណើរទស្សនកិច្ចរយៈពេល ៣ថ្ងៃ ឯកឧត្តម ស៊ូ សុជាតិ បានដឹកនាំប្រតិភូចុះទស្សនកិច្ចនៅតាមទីតាំងដែលជាហេដ្ឋារចនាសម្ព័ន្ធ និងផលិតករខុម៉ូនីធីសំខាន់ៗមួយចំនួន រួមមាន៖ ទីផ្សារខុម៉ូឌីធីអន្តរជាតិហៃណាន (HICE) នៅក្នុងទីក្រុងសាន់យ៉ា, ក្រុមហ៊ុន ACC Acceleration Park, តំបន់ពិសេស Haikou Comprehensive Bonded Zone, និងក្រុមហ៊ុន Hainan State Farms Investment Holding Group Co.,Ltd. នៅស្រុកឈឹងម៉ៃ ខេត្តហៃណានផងដែរ។ នេះបើយោងតាមការចុះផ្សាយរបស់និយ័តករមូលបត្រកម្ពុជា៕