ភ្នំពេញ៖ កម្ពុជា មានគោលដៅចុះបញ្ជីរថយន្តអគ្គិសនី ឱ្យបាន ៦ម៉ឺនគ្រឿង ក្នុងឆ្នាំ២០៣០ ដោយក្នុងនោះរថយន្តអគ្គិសនីសុទ្ធសរុបមានចំនួន ៣ម៉ឺនគ្រឿង ដោយក្នុងនោះរថយន្តទេសចរណ៍អគ្គិសនីសុទ្ធមានចំនួន ២,៥ម៉ឺនគ្រឿង និងរថយន្តអគ្គិសនីសុទ្ធបម្រើក្នុងសកម្មភាពអាជីវកម្មមានចំនួន ៥ពាន់គ្រឿង។

ដោយឡែក សម្រាប់គោលដៅចុះបញ្ជីទោចក្រយានយន្តអគ្គិសនីសុទ្ធសរុបមានចំនួន ៧,២ម៉ឺនគ្រឿង និង ត្រីចក្រយានយន្តអគ្គិសនីសុទ្ធសរុបមានចំនួន ២ម៉ឺនគ្រឿង ព្រមទាំងជំរុញការអភិវឌ្ឍប្រព័ន្ធអេកូឡូស៊ីរបស់វិស័យយានយន្តអគ្គិសនី ដើម្បីធានាបាននូវសមតុល្យទាំងផ្នែកសេដ្ឋកិច្ច សុខុមាលភាពរបស់ប្រជាពលរដ្ឋ និងបរិស្ថានល្អ។ គោលនយោបាយជាតិស្តីពី ការអភិវឌ្ឍវិស័យយានយន្តអគ្គិសនី២០២៤- ២០៣០ បានដាក់ចេញនូវវិធានការមុតស្រួច និងកំណត់ពីការទទួលខុសត្រូវអនុវត្ត របស់ក្រសួងស្ថាប័ន និងតួអង្គពាក់ព័ន្ធ ព្រមទាំងក្របខ័ណ្ឌពេលវេលាអនុវត្តជាក់លាក់។

ទន្ទឹមនេះ គោលនយោបាយរបស់រាជរដ្ឋាភិបាល ដែលដាក់ចេញនេះ បានបង្ហាញពីការប្តេជ្ញាចិត្ត និងជំនឿយ៉ាងមុតមាំក្នុងការអភិវឌ្ឍប្រព័ន្ធអេកូឡូស៊ី វិស័យយានយន្តអគ្គិសនីនៅកម្ពុជា សំដៅប្រែក្លាយជាប្រទេសដែលលើកកម្ពស់ការប្រើប្រាស់យានយន្តអគ្គិសនី រយៈពេលមធ្យម និងវែងខាងមុខ ដើម្បីជំរុញការអភិវឌ្ឍកម្ពុជា ប្រកបដោយចីរភាព ដោយថ្លឹងថ្លែង ទាំងទិដ្ឋភាពសេដ្ឋកិច្ច សង្គម និងបរិស្ថាន៕

ប្រភពពីសៀវភៅ៖ គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី២០២៤- ២០៣០