ភ្នំពេញ៖ ក្រសួងទេសចរណ៍ និងក្រុមហ៊ុន Cambodian Broadcasting Service Co., Ltd. (CBS) នឹងសហការផលិត និងទាក់ទាញការផលិតភាពយន្តទេសចរណ៍ឱ្យបានច្រើន រួមទាំងគម្រោងថតកម្មវិធីទូរទស្សន៍ថ្មីៗ ដើម្បីផ្សព្វផ្សាយសក្តានុពលទេសចរណ៍កម្ពុជា ដល់ពិភពលោក និងទាក់ទាញភ្ញៀវទេសចរអន្តរជាតិបន្ថែម។

ក្នុងជំនួបជាមួយ លោក David Elliott Ulmer នាយកប្រតិបត្តិក្រុមហ៊ុន Cambodian Broadcasting Service Co., Ltd. (CBS) ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានវាយតម្លៃខ្ពស់ចំពោះគំនិតផ្តួចផ្តើម និងគម្រោងដ៏ល្អរបស់ក្រុមហ៊ុន CBS ដែលមើលឃើញពីសក្តានុពលទេសចរណ៍ដ៏សំបូរបែប និងកាលានុវត្តវិនិយោគរបស់កម្ពុជា។

ឯកឧត្តម ហួត ហាក់ មានប្រសាសន៍ថា កិច្ចសហការខាងលើនេះ នឹងចូលរួមជួយផ្សព្វផ្សាយពីស្ថានភាពនយោបាយ សេដ្ឋកិច្ច សន្តិសុខសង្គម និងសណ្តាប់ធ្នាប់សាធារណៈដ៏ល្អរបស់កម្ពុជា ក៏ដូចជាការធានានូវសុខសុវត្ថិភាពដល់អ្នកទេសចរ និងវិនិយោគិនអន្តរជាតិរបស់រាជរដ្ឋាភិបាលកម្ពុជា ផងដែរ។ នេះបើតាមការចុះផ្សាយរបស់ ក្រសួងទេសចរណ៍ កាលពីថ្ងៃទី១២ ខែមិថុនា ឆ្នាំ២០២៥៕