ភ្នំពេញ៖ សម្តេចធិបតី ហ៊ុន ម៉ាណែត និង ឯកឧត្តម Emomali Rahmon ប្រធានាធិបតីប្រទេសតាជីគីស្ថាន ឯកភាពបន្តពង្រឹង និងពង្រីកកិច្ចសហប្រតិបត្តិការទ្វេភាគីក្នុងវិស័យថាមពលស្អាត កសិកម្ម និងអប់រំ។ ការឯកភាពនេះ ត្រូវបានធ្វើឡើងស្របពេលថ្នាក់ដឹកនាំប្រទេសទាំងពីរ ចូលរួមសន្និសីទ លើកទី៣ របស់អង្គការសហប្រជាជាតិ ស្ដីពីមហាសមុទ្រ (UNOC3) ចាប់ពីថ្ងៃទី៨-១៣ ខែមិថុនា ឆ្នាំ២០២៥ នៅទីក្រុងនីស ប្រទេសបារាំង។

ក្នុងជំនួបជាមួយ សម្តេចធិបតី ហ៊ុន ម៉ាណែត កាលពីថ្ងៃទី៩ ខែមិថុនា ឯកឧត្តម Emomali Rahmon បានលើកឡើងពីសក្តានុពលរបស់ប្រទេសតាជីគីស្ថាន ដែលមានឧត្តមភាពខាងវិស័យថាមពល, ថាមពលស្អាត និងគោលដៅប្រើប្រាស់ថាមពលស្អាតឱ្យបាន ១០០% ត្រឹមឆ្នាំ២០៣៨។ ឯកឧត្តម បន្តថា កម្ពុជាជាប្រទេសមានសក្តានុពលផ្នែកកសិកម្ម ដូច្នេះកម្ពុជា អាចធានានូវការផ្គត់ផ្គង់ស្បៀងក្នុងស្រុក និងមានអតិរេកស្បៀងសម្រាប់បម្រើដល់ការនាំចេញទៅកាន់ទីផ្សារអន្តរជាតិផងដែរ។

សម្តេចធិបតី ហ៊ុន ម៉ាណែត លើកឡើងថា ជំនួបទ្វេភាគីនេះ ជាឱកាសសម្រាប់ការស្វែងរកកាលានុវត្តភាពនៃកិច្ចសហប្រតិបត្តិការលើវិស័យសំខាន់ៗរវាង ប្រទេសទាំងពីរ។ ថ្នាក់ដឹកនាំនៃប្រទេសកម្ពុជា និងតាជីគីស្ថាន បានឯកភាពក្នុងការបំពេញទស្សនកិច្ចផ្លូវការ ទៅវិញទៅមក នាពេលវេលាសមស្របខាងមុខ ដោយប្រគល់ភារកិច្ចដល់រដ្ឋមន្ត្រីការបរទេសប្រទេសទាំងពីរ បន្តផ្សារភ្ជាប់ទំនាក់ទំនងឱ្យកាន់តែជិតស្និទ្ធ ក្នុងការស្វែងរកកាលានុវត្តភាពនៃកិច្ចសហប្រតិបត្តិការ ក៏ដូចជាសម្របសម្រួលដំណើរទស្សនកិច្ចរបស់ថ្នាក់ដឹកនាំទាំងពីរ។ នេះបើតាមការចុះផ្សាយរបស់ សម្តេចធិបតី ហ៊ុន ម៉ាណែត៕