ភ្នំពេញ៖ ក្រសួងសាធារណការ និងដឹកជញ្ជូនកម្ពុជា និងនាយកដ្ឋានផ្លូវគោក នៃក្រសួងសំណង់វៀតណាម បើកកិច្ចប្រជុំទ្វេភាគីលើកទី១០ ស្ដីពីការដឹកជញ្ជូនតាមផ្លូវគោក ដើម្បីពិនិត្យឡើងវិញនូវកំណត់ហេតុនៃកិច្ចប្រជុំទ្វេភាគីលើកទី៩ ស្ដីពីការដឹកជញ្ជូនតាមផ្លូវគោក រវាងប្រទេសទាំងពីរ និងតាមដានការអនុវត្តកិច្ចព្រមព្រៀង និងពិធីសារការដឹកជញ្ជូនតាមផ្លូវគោក។

ក្នុងកិច្ចប្រជុំ ដែលដឹកនាំដោយ ឯកឧត្ដម ប៉ែន បូរាណ អនុរដ្ឋលេខាធិការក្រសួងសាធារណការ និងដឹកជញ្ជូន និងលោកស្រី ផាន ធី ធូ ហៀន (Phan Thi Thu Hien) អគ្គនាយករងនាយកដ្ឋានផ្លូវគោក នៃក្រសួងសំណង់វៀតណាម ភាគីទាំងពីរ ក៏បានពិភាក្សាអំពីបញ្ហាប្រឈមផ្សេងៗ ក៏ដូចជាស្វែងរកដំណោះស្រាយរួមដែលកំពុងកើតមានឡើងពាក់ព័ន្ធនឹងការដឹកជញ្ជូនឆ្លងកាត់ព្រំដែនផងដែរ។

កិច្ចប្រជុំទ្វេភាគី ដែលធ្វើឡើង កាលពីថ្ងៃទី២០-២១ ខែឧសភា ឆ្នាំ២០២៥ នេះ ក៏មានគណៈប្រតិភូកម្ពុជាមកពីអន្តរក្រសួង-ស្ថាប័ន អាជ្ញាធរខេត្តជាប់ព្រំដែនកម្ពុជា-វៀតណាមទាំង ៩ខេត្ត និងវិស័យឯកជន ដោយក្នុងនោះសមាសភាពទាំងពីរភាគី មានប្រមាណ ១៥០នាក់ (ភាគីកម្ពុជាចំនួន ៧៨នាក់)។ នេះបើតាមការចុះផ្សាយរបស់ក្រសួងសាធារណការ។

គួរបញ្ជាក់ថា កិច្ចប្រជុំនេះ បានអាក់ខានរៀបចំឡើងអស់រយៈពេលប្រមាណ ៥ឆ្នាំ ដោយសារតែជំងឺរាតត្បាតកូវីដ-១៩ ហើយការរៀបចំកិច្ចប្រជុំនេះឡើងសារជាថ្មី បានសបញ្ជាក់យ៉ាងច្បាស់អំពីគោលបំណងក្នុងការដោះស្រាយបញ្ហារួមនៃកម្ពុជា-វៀតណាម ដែលជួបប្រទះដោយប្រតិបត្តិករដឹកជញ្ជូនផងដែរ៕