ភ្នំពេញ៖ ដើម្បីកាត់បន្ថយការនាំចេញផលិតផលស្វាយចន្ទីមិនទាន់កែច្នៃទៅប្រទេសជិតខាង ដែលធ្វើឱ្យកម្ពុជា បាត់បង់ការងារ និងតម្លៃបន្ថែមរបស់ស្វាយចន្ទី រាជរដ្ឋាភិបាល បានដាក់ចេញនូវគោលនយោបាយជាតិស្តីពី ស្វាយចន្ទីឆ្នាំ២០២២-២០២៧ ស្របតាមយុទ្ធសាស្ត្រ ចតុកោណដំណាក់កាលទី៤ របស់រាជរដ្ឋាភិបាលកម្ពុជា ដោយលើកកម្ពស់ផលិតកម្ម និងផលិតភាពប្រកបដោយភាពប្រកួតប្រជែង។

ការដាក់ចេញនូវគោលនយោបាយជាតិស្តីពី ស្វាយចន្ទីនេះ នឹងជួយជំរុញការប្រកួតប្រជែងទាំងទិន្នផលនិងគុណភាព ការធ្វើពិពិធកម្មការកែច្នៃ ការនាំចេញ និងបង្កើនតម្លៃបន្ថែមដល់ភាគីពាក់ព័ន្ធក្នុងខ្សែច្រវាក់តម្លៃ សំដៅជួយគាំទ្រដល់តួអង្គដែលមានស្រាប់ និងទាក់ទាញការវិនិយោគបន្ថែម ព្រមទាំងការរក្សាទីផ្សារចាស់ និងការស្វែងរកទីផ្សារថ្មីប្រកបដោយចីរភាព។

ការចូលរួមពីក្រសួងស្ថាប័នពាក់ព័ន្ធក្នុងការអនុវត្តគោលនយោបាយជាតិស្តីពី ស្វាយចន្ទី ដែលបានកំណត់នៅក្នុងចក្ខុវិស័យច្បាស់លាស់ប្រកបដោយភាពជោគជ័យ គឺជាការចាប់យកកាលានុវត្តភាពប្រកួតប្រជែងនៅក្នុងទីផ្សារ តាមរយៈការនាំចេញផលិតផលស្វាយចន្ទីកម្ពុជា ទៅកាន់ទីផ្សារក្នុងតំបន់និងពិភពលោក ដោយកាត់បន្ថយការនាំចេញស្វាយចន្ទីមិនទាន់កែច្នៃ ដើម្បីបង្កើតការងារ និងតម្លៃបន្ថែមដល់ពលរដ្ឋ កាត់បន្ថយភាពក្រីក្រ និងចំណាកស្រុក ព្រមទាំងជួយជំរុញកំណើនសេដ្ឋកិច្ចជាតិ៕

ប្រភពពីសៀវភៅ៖ គោលនយោបាយជាតិស្តីពី ស្វាយចន្ទី ឆ្នាំ២០២២-២០២៧